El premiu del X Concursu de Recoyida de Toponimia ‘Concha de Lama’ del Club Xeitu foi otorgáu al trabayu ‘Toponimia de La Urz’, presentáu por Marta Prieto Sarro. La Urz ye una pequena localidá del conceyu de Riello, nel corazón de la contorna d’Omaña, que nel últimu censu de población suma 23 habitantes.
El xuráu valoró “la riqueza de los topónimos apurríos, les sos descripciones ya intereses, qu’en xunto colos apuntes xeográficos y hestóricos apurríos, dende los aspeutos rellacionaos colos llabores del campu hasta’l papel de la Ilesia nel pasáu, conformen un trabayu de gran relevancia na recuperación del patrimoniu inmaterial del nuesu monte”.
El xuráu tuvo integráu nesta convocatoria por Manuel Gancedo, presidente del Club Xeitu, y Luis Fernández, autor de la obra premiada na última convocatoria del concursu, actuando como secretariu con voz y ensin votu Víctor del Regueru.
El Concursu de Recoyida de Toponimia ‘Concha de Lama’ cumplió anguaño la so décima edición, convocáu dende 2012 col sofitu del Institutu Lleonés de Cultura. El premiu ta dotáu con 500 euros y la publicación de la obra premiada na serie que’l Club Xeitu caltien dedicada a esta materia, y que suma yá once títulos de distintos pueblos de Babia, L.laciana y Omaña.
Marta Prieto Sarro (Madrid, 1963) ye llicenciada en Filoloxía Clásica. Desenvolvió una llarga carrera na enseñanza como profesora de Llatín, materia qu’imparte anguaño nel IES Ordoño II de Llión. Collaboradora asidua en distintos medios de comunicación, ye autora de publicaciones de divulgación histórica, artística y etnográfica, ente les que s’atopen Lois, la cátedra del monte y Lleoneses na hestoria, dambes de la editorial Rimpego. L’autora foi amás reconocida con otros premios, como’l Llibru Lleonés del Añu pol so llibru Cistierna y la so redolada, el premiu “César Morán” y el de poesía “Voces de Muyer” del Conceyu de Astorga.
