La Conseyería de Mediu Rural y Cohesión Territorial publicó güei nel Boletín Oficial del Principáu (BOPA) la convocatoria d’ayudes empobinaes a l’acuicultura, la comercialización y tresformación de productos pesqueros pa esti exerciciu, dotada con 1.053.440 euros. Trátase de subvenciones plurianuales, cofinanciaes pola Unión Europea al traviés del Fondu Européu Marítimu y de Pesca (FEMP).
La llinia de sofitu a l’acuicultura tien como oxetivu fomentar una acuicultura sostenible y competitiva, qu’aumente los efectos positivos nel mediu ambiente con inversiones que faen medrar la eficiencia nel usu de los recursos y favorecen l’usu d’enerxía renovable, amás de la xeneración d’enerxía a partir del procesu productivu. Tamién facilita la creación d’empreses nueves.
Les sovenciones a la comercialización y tresformación de productos de la pesca y l’acuicultura empobínense a promover la competitividá del sector. Nesti sentíu, incentívense midíes que fomenten la calidá y valor añedíu de los productos sostenibles de la pesca y l’acuicultura, sofitando proyectos rellacionaos col aforru enerxéticu, el tratamientu de residuos o la tresformación de captures de pexe comercial que nun se pue destinar a consumu humanu, ente otres. Esta llinia tamién contempla acciones empobinaes a facilitar l’accesu a mercaos nuevos, promocionar productos sostenibles y ameyorar la trazabilidá.
Anguaño, n’Asturies hai 8 empreses acuícoles y una ventena pertenecientes al sector de la tresformación que van poder optar a estos fondos, que se reparten tal como se reflexa nesta tabla:
Convocatoria | 2021 | 2022 | Total euros |
Acuicultura | 153.440 | 100.000 | 253.440 |
Comercialización y tresformación productos pesca y acuicultura | 500.000 | 300.000 | 800.000 |
653.440 | 400.000 | 1.053.440 |
Na convocatoria del 2020 sofitáronse 11 proyectos que recibieron daqué más de 847.000 euros n’ayudes y movilizaron una inversión global de cuasi 1,7 millones. Del total de les iniciatives, cinco yeren d’empreses d’acuicultura y ocho de compañíes de tresformación de productos pesqueros.