La Conseyería de Mediu Rural y Política Agraria aumentó anguaño casi un 50% les ayudes a la promoción de la Indicación Xeográfica Protexía (IXP) Choscu de Tinéu, en concretu, un 49,6%, al pasar de los 25.300 euros que recibió en 2022 a los 37.865 que se destinen esti exerciciu al mesmu fin.
Según los datos que dio a conocer güei’l conseyeru de Mediu Rural y Política Agraria, Marcelino Marcos, nel XXII Festival del Choscu de Tinéu, esti productu recibió anguaño una sovención de 54.365 euros, de los que 16.500 se dirixen al control y certificación del productu y el restu, a la so promoción.
El conseyeru destacó tamién la notable crecedera de producción qu’esperimentó la IXP Choscu de Tinéu, al algamar les 67.599 pieces comercializaes l’añu pasáu, 4.561 más que l’anterior, lo que supón más del 7,2% de crecedera.
Amás, el valor económicu de la comercialización del choscu asitióse en 2022 nos 878.787 euros, la cifra más alta de la hestoria d’esta IXP, polo que Marcos Líndez amosó la so allegría por estos datos y espresó’l so enfotu en que nesti exerciciu puedan superase eses cifres.
