El Bopa publica güei la convocatoria d’ayudes, que cunten con financiamientu del Fondu Européu Marítimu y de Pesca.
La Conseyería de Mediu Rural y Cohesión Territorial publicó güei nel Boletín Oficial del Principáu d’Asturies (BOPA) la convocatoria d’ayudes a les cofraderíes de marineros que xestionen planes d’esplotación de percebe, pulpu y angula p’anguaño, dotada con 348.500 euros. Trátase de subvenciones plurianuales, cofinanciaes pola Unión Europea al traviés del Fondu Européu Marítimu y de Pesca (FEMP).
Los planes d’esplotación suponen una ferramienta fundamental pal desenvolvimientu d’una actividá pesquera responsable, porque garanticen la sostenibilidá de los recursos marinos y la viabilidá del sector al plazu llargu. Al traviés d’esti instrumentu, acútase’l númberu de participantes, de la que se regulen y controlen les especies. Nesti contestu, les ayudes dexen reforzar la collaboración pa una meyor ordenación.
El director xeneral de Pesca Marítima, Francisco González, esplicó que les llimitaciones a les captures convierten en vitales actividaes pesqueres que l’Alministración xestiona como planes d’esplotación en collaboración coles cofraderíes que, al traviés de les ayudes, reciben sofitu pa los sos gastos de funcionamientu. González señaló qu’esta convocatoria aumenta un 8,2 % al respective del añu anterior, pa sofitar la puesta en marcha de planes nuevos d’esplotación.
Anguaño, n’Asturies hai once planes d’esplotación xestionaos por 14 cofraderíes, de les qu’ocho son pal percebe, ún pal pulpu y dos pa l’angula.
