Mirlo Perdido, cantante asturiana, ta acabante de publicar el so primer cantar nes principales plataformes d’escucha, como son Spotify y YouTube. Esti cantar llámase La Medusa y el videoclip, grabáu pola fotógrafa Ana González García, pue vese equí, onde l’artista apaez na sablera de Xagó antroxada de medusa y baillando.
De la producción musical encárgase’l productor y teclista Chus Naves, que formó parte del grupu Koniec, participó nel discu de Lucas 15 con Xel Pereda y Nacho Vegas y llevó la producción del discu Y andá d’Anabel Santiago. Pa los coros cuntóse tamién con Elba Naves. A la guitarra ta Emilio Fidalgo, El Malo, que formó parte del grupu El Bueno, El Feo y El Malo, y sacó el so discu Llegó Godot l’añu pasáu.
La cantante va publicar amás, esti vienres 3 de febreru un cantar nuevu, tituláu Luna Llena, nuna campaña na que, selemente, va dir asoleyando nuevos temes.
