El pasáu mes d’avientu la banda punk-rock Misiva publicó’l so trabayu nuevu, l’EP Mala Relixón. El sábadu 25 de marzu van presentalu en directo na Sala Gong d’Uviéu, nun conciertu nel que van tar acompañaos del grupu punk Ochobre. Pa calentar motores, la formación moscona estrena’l videoclip de “La Cárcel”, cantar col que zarren l’EP.
«El videu fala de la condena na que tamos cualquiera de nós, de como vamos prendiendo la máquina d’odiar hasta que nos decatamos de que tamos viviendo una sinrazón de la que nun somos a fuxir», comenta’l grupu nes sos redes sociales sobre esta obra audiovisual creada por Titi Muñoz, como ye vezu nos videos de Misiva. Precisamente l’anterior videoclip d’esti EP nuevu,”Mar Adientro“, yá lo ficiera esti prestixosu realizador.
Mala Relixón grabóse nel OVNI Estudio, en Bonielles, baxo la dirección técnica de Pablo Martínez, encargáu de la producción, mezcla y masterización del discu. Nesti EP la banda punk rock presenta «cuatro cañonazos enllenos d’enerxía, de riffs mui curiaos y de voces sorprendentes». En cuantes a les lletres, n’elles falen de «frayar colos patrones y los programes nos llanten dende neños y de volver al orixe, a la esencia de caún». «Ye un glayíu d’esperanza y un invitación a mirar pa dientro, que ye onde tán al final toles respuestes», comenta’l grupu.
Directos n’Uviéu y nel Tsunami Xixón
Les entraes entraes anticipaes yá tán a la venta online por 10 euros pa la cita col punk n’asturianu que va haber el 25 de marzu, a les 20.30h, na sala Gong d’Uviéu. Misiva va presentar Mala Relixón xunto a Ochobre, una de les bandes moces que ta garrando’l relevu nel rock astur de grupos míticos como Dixebra, Skama la Rede o Skontra. Amás, Misiva tamién van toca en xunetu nel festival Tsunami Xixón xunto a pernomaos grupos de la escena.
