El grupu Morgan va ufrir un conciertu esti sábadu 26 de febreru, a les 21:00 hores, nel Teatru de la Llaboral. Morgan va presentar en Xixón el so tercer trabayu d’estudiu, The river and the stone, diez cantares nes qu’empezaron a trabayar tres el confinamientu en 2020 y que son amás la resultancia de “munches conversaciones, munches hores de creación conxunta y d’esfrutar de faer música con amigos”. Tres casi un añu de trabayu, el grupu viaxó a Francia pa grabar l’álbum nel estudiu Le Manoir de Léon al pie de Campi Campón na producción. Ta entemecíu por Stuart White en Los Ánxeles y masterizáu por Colin Leonard en Atlanta.
Morgan nació como proyectu nel 2012, cuando Nina de Juan (pianu y voz), enseñó les sos composiciones a Paco López (guitarra y voz) y a Ekain Elorza (batería). En 2015 grabaron el so primer álbum d’estudiu, North, autoeditado y distribuyíu por ellos mesmos. El discu salió a la vienta en febreru de 2016, coincidiendo cola incorporación d’Alejandro Ovejero como baxista y David Schulthess al tecláu de la formación, que yá empezaba a dar los sos primeros conciertos en formatu eléctricu. De magar, Morgan nun pararon de tocar en directu, percorriendo les sales de tola península o en festivales como Mad Cool o Sonorama.
A principios de 2018 publicaron Air, de nuevu autoeditáu, un discu cuayáu nel más del centenar de conciertos que dieron l’añu anterior. Amás d’escosar les entraes de munches de les sos actuaciones, como’l doblete nel Teatru Circu Price, y de tocar n’Irlanda o Reinu Uníu, tamién ganaron cinco Premios de la Música Independiente, ente ellos el de meyor artista, meyor álbum y meyor directu del añu en 2019.
Amás, a principios de 2020 ufiertaron un conciertu nel que revistieron d’arreglos sinfónicos el so repertoriu nel Teatru Real y mientres grababen The river and the stone, llanzaron en 2021 el so primer directu grabáu nel Circu Price de Madrid mientres los dos conciertos que la banda ufiertó ellí en xineru de 2019.
