Nes sos vixilancies del pasiellu de bachilleratu del Corazón de María, el padre Villanueva entraba nes aules y cuando atopaba a un grupu ensin profesor, dicía «¡Güérfanos, nunca!». Una fras recordada con ciñu polos miles d’estudiantes que dende los años cincuenta tuvieron embaxo los sos cuidaos. El padre Villanueva, cura claretianu del Colexu Corazón de María de Xixón, morrió esta mañana a los 96 años dexando un fondu pesar na comunidá del Codema, na que yera una persona mui querida.
La muerte llegó-y na residencia de sacerdotes de la so orde, en Llión, onde foi treslladáu’l pasáu 19 d’avientu tres delles selmanes ingresáu nel Hospital de Cabueñes. El Padre Villanueva, d’orixe navarru, estudió nos seminarios de Beire y Santo Domingo de la Calzada y vivió de neñu en Donostia, nel País Vascu, onde s’aficionó a la música coral. La so ordenación como sacerdote tuvo llugar en Bilbao, onde entamó tamién a ser docente. Al pocu tiempu la orde treslládalu a Xixón, onde’l CODEMA taba en plenu procesu de construcción de les instalaciones que diben a convertilu nun de los colexos más grandes de la ciudá. Na escuela xixonesa foi profesor d’Hestoria del Arte y Lliteratura, con fama d’esixente.
La muerte llegó-y na residencia de sacerdotes de la so orde, en Llión, tres delles selmanes ingresáu nel Hospital de Cabueñes
Amás de la so vida como cura y profesor, el padre Villanueva tenía actividaes fuera del centru. Participó na película Jandro, que protagonizó en 1965 Arturo Fernández. Amás foi capellán de la plaza toros y d’una comunidá de monxes de Viesques. A finales de sieglu dexó les clases pa convertise en cuidador del orde nos pasiellos del centru y organizador de les graduaciones hasta los 89 años, en 2011. Nesi mesmu cursu recibió un homenaxe de tola comunidá educativa.
Ente los alumnos que pasaron peles sos clases o tuvieron embaxo la so vixilancia tuvieron dalgunos de sonadía, como los expresidentes d’Asturies, Antonio Trevín y Francisco Álvarez-Cascos, los actores Roberto Álvarez Ruiz y Sergio Buelga, los deportistes Chechu Rubiera y Nacho Cases, los periodistes Ricardo Rosety, Inaciu Galán y Pachi Poncela o l’escritor y miembru de l’Academia de la Llingua Asturiana, Vicente García Oliva.
La misa na so alcordanza en Xixón sedrá’l xueves 9 a les 18 hores na Ilesia del Colexu Corazón de María, con entrada pela avenida Pablo Iglesias.
