Llaboral Ciudá de la Cultura va acoyer los díes 16, 17 y 18 d’abril Música en Rede, Alcuentru Profesional, una muestra sectorial dedicada a la industria musical asturiana que se realiza nel marcu d’Asturies, Cultura en Rede, un proyectu de la Viceconseyería de Cultura, Política Llingüística y Deporte xestionáu pola Sociedá Pública de Xestión y Promoción Turística y Cultural del Principáu d’Asturies.
Música en Rede va incluyir alcuentros comerciales (Xuntes), conferencies y meses d’alderique (Conxustes), presentaciones curties de proyectos (Rolda), talleres técnicos (Erbíes), un puntu d’asesoramientu (En Rede) y showcases (Llabor), que busquen visibilizar el talentu de los artistes asturianos y crear sinerxes y espacios de debate ente profesionales del sector.
Ta previsto que la muestra incluya 12 actuaciones en formatu showcase (Llabor), seis de formatu pequeñu nel Paraninfu de la Llaboral y otres seis de formatu medianu o grande nel Teatru de la Llaboral, con una duración máxima de 25 minutos caúna. Güei ábrese’l periodu d’inscripción pa participar nestes actuaciones y les solicitúes van poder presentase hasta’l 29 de febreru a les 12 hores al traviés de http://panel.asturiesculturaenrede.es. Los detalles de la convocatoria tán disponibles na web asturiesculturaenrede.es.
Pa participar nes demás actividaes, los profesionales interesaos han formalizar la solicitú a partir del 15 de marzu al traviés del formulariu que va tar disponible na web d’Asturies, Cultura en Rede.
