La banda asturiana formada en 2004 va tar esti viernes 5 de xineru tocando na sala Tizón de Xixón pa facer un repás a tola so trayectoria. Y ye que la banda de rock alternativu cumple agora veinti años dende la so formación, teniendo conseguío asoleyar cuatro discos d’estudiu, numeroses nominaciones nos premios “AMAS” y reconocimientos como’l de “40 Principales Asturies” ente otros. Precisamente foi en 2009 cuando se-yos destacó como ún de los meyores directos del panorama asturianu con mención especial al so single “It Was Only a Kiss” disponible nel so primer álbum Above the clouds (2006). Solamente un añu después de tener fecha la B.S.O del FICX y de participar nes llamaes “Demoscopicas” de la Revista Mondosonoro. Tuvieron ocasión de compartir escenario con bandes internacionales como The Rasmus, The Dudes o Turbonegro en distintos shows y festivales d’Asturies.
Con ello, siguiríen sacando discos como Space Cake (2008) o l’álbum homónimu MyStereo (2012) En 2015 tamién contribuyeron al audiovisual asturianu, siendo esto una constante na so carrera, al facer la banda sonora de los Hermanos Junquera Judge Dredd. Nel pasáu 2022 espublizaron Panic. Pal conciertu del 5 de xineru na sala Tizón que, de xuru va ser especial tanto pa los integrantes de la banda como pa los seguidores, va vese en pallabres d’Adrián Muñiz, vocalista del grupu: “una banda con personalidá propia” y una “conexón” que los fai ser “una familia musical dempués de tantos años tocando xuntos”. Sobre’l so asoleyamientu caberu Panic, decláranos Muñiz que ye: “muncho más directo” y que ye muncho más afayadizu y “rotundo” pal directu que, reconoz, ye’l so “puntu fuerte” como banda onde experimenten “distintos matices” llegando a “trescender estilos”. Igualmente Mystereo sigue col so sellu personal de facer un rock directu, noventeru y qu’usa l’inglés como llingua d’espresión pa tresmitir lletres que van dende cuestiones de crítica social, esistencial o a les propies relaciones personales, ensin renunciar a la crudeza o la escuridá cuando ye necesario.
El show va ser el viernes 5 de xineru a les 21 hores na Sala Tizón (C/ Capua, 8) y les entraes pueden alquirise de forma presencial en Xixón na Cervecería La Mina (C/ Santa Lucía, 7-baxu) y na mítica Llibrería Paradiso (C/ La Mercé, 28). Pa la so compra online pueden mercase nesti enllaz.
