El gobiernu d’Asturies constituyó ayeri la Mesa Sectorial d’Instituciones Culturales, que supón un importante pasu pa la creación del futuru Conseyu de la Cultura d’Asturies, y qu’axuntó a representantes de les alministraciones autonómica y locales, de la Universidá d’Uviéu y de los equipamientos culturales públicos y privaos, coles mires de poner de mancomún necesidaes y potenciar estos recursos. La puesta en marcha d’esti órganu ye una amuesa del compromisu de la conseyera de Cultura, Política Llingüística y Deporte, Vanessa Gutiérrez, col diálogu y la participación dientro del sector.
Mientres la sesión, la titular de Cultura destacó la importante función que desempeñen los equipamientos culturales de la comunidá, que son garantes y promotores del accesu universal a la cultura y dinamizadores de les zones onde s’asienten, de la que favorecen la cohesión territorial y tamién social.
Nel alcuentru informóse sobre’l procesu d’ellaboración de los proyectos de les lleis d’archivos, de museos y de biblioteques. Esti postreru, por casu, plantega la universalización del derechu de la ciudadanía al accesu a los servicios bibliotecarios, independientemente del conceyu de residencia.
Tamién s’encetaron na sesión distintes proyectos de mancomún, como’l qu’impulsen la Conseyería de Cultura y l’Universidá d’Uviéu pa entamar unes xornaes sobre les bones práctiques nos museos.
Al marxe de la mesa sectorial constituyida esta tarde, Cultura trabaya yá na creación d’otros siete venceyaes a los ámbitos de la tradición, les artes escéniques, el cine y el campu audiovisual, les lletres, la música, les artes y los videoxuegos ya innovación. Ta previstu que les primeres xuntes se convoquen mientres les próximes selmanes. Darréu va escoyese a los representantes de cada grupu de trabayu pa constituyir un nuevu Conseyu de la Cultura nel que se favoreza la transversalidad y la cooperación ente los distintos ámbitos del sector.
Les meses, que busquen facilitar el diálogu, la coordinación y la collaboración ente les distintes instituciones, van encargase d’enriar pidimientos y propuestes, mesmo que d’asesorar al Gobiernu d’Asturies, tanto nes sos polítiques de fomentu de la cultura como na evaluación de la situación de los profesionales. Tamién se van ocupar d’ellaborar, xuntu col Gobiernu, una nueva radiografía d’estes actividaes na comunidá, que va sirvir de base pa redactar la Estratexa de la Cultura Asturiana. Esti nuevu modelu de xestión va dexar planiar de forma conxunta y consensuada les polítiques públiques empobinaes a potenciar la cultura.
