El vecino cunta la hestoria de Javier (Quim Gutiérrez) al que nun-y van demasiáu bien les coses. Malapenes llega a fin de mes con un trabayu precariu, el so negociu de camisetes con frases esanimadores nun acaba de trunfar y la so relación con Lola (Clara Lago) va dando tumbos dende va unos meses. Lo que menos precisaba Javier ye qu’un estraterrestre cayéra-y enriba y pasára-y los so superpoderes enantes de morrer. Javier convirtióse en tou un superhéroe pero nun-y va muncho meyor qu’antes.
Ésta ye la premisa sobro la que s’asitia El vecino, la nueva serie de Netflix, escrita por Miguel Esteban y Raúl Navarro y que cunta con Carlos de Pando y Sara Antuña como showrunners. La ficción va ser la protagonista de la sesión inaugural de la 57ª Edición del Festival Internacional de Cine de Xixón. El públicu asistente a l’amuesa xixonesa va ser, poro, el primeru que va poder ver los dos primeros capítulos d’esta producción de Zeta Audiovisual pal serviciu d’Internet llíder nel mundu. Netflix tien más de 158 millones de suscriptores y ta presenta en más de 190 países.
El so primer capítulu, dirixíu por Nacho Vigalondo, refuerza tamién la vinculación del FICX col cineasta cántabru, que yá estrenó en Xixón el so curtiumetraxe nomáu al Oscar de Hollywood 7:35 de la mañanay establez una ponte con el mesmu orixe del Festival, que nació en 1963 como Certame Internacional de Cine y Televisión de la mano del apocayá fináu Isaac del Rivero.
