Fai unos pocos meses que los Non Fungible Tokens o NFTs (una serie de creaciones dixitales de les que puedes mercar la so propiedá esclusiva, anque cualquiera puede tener esa imaxe de manera gratuita) se ficieron mui famosos y, dende entós, el so mercáu medró enforma. Sicasí, esta xera nun ye la pita de los güevos d’oru, y ye que los problemes que xenera la creación de NFTs ye bien grande. La idea de creaciones dixitales nun ye mala en sí mesma, pero les consecuencies son desastroses dende munches perspectives.
Entamando pola más esencial, el desenvolvimientu d’esta tecnoloxía supónse como una nueva oportunidá pa los artistes d’esparder la so obra y ganar bien de perres con ello, y ye que los precios nestes ventes son altísimos. Sicasí, esto nun ye asina, y vemos como los artistes pequenos tienen que gastar en crear esta xera y en mui poques ocasiones ven unes ganancies nos sos productos. ¿Quién se lleva entos les perres? Ye bien fácil, namás que los grandes artistes o creadores de conteníu que ven nesto una nueva oportunidá de ganar dinero, ensin importa-yos l’arte o la cultura… y ye que namás hai que ver el discursu de xente que crea conteníu, como’l youtuber Willyrex, que cambia los sos argumentos dependiendo de los sos intereses. Son los conocíos como “cryptobros”.
Per otru llau, la contaminación que produz esta xera ye ablucante. Al igual que coles criptomonedes, la tecnoloxía que fai funcionar estes creaciones, ye dicir, la minería d’estos productos, xenera una montonera de contaminación, que s’añede a tolos problemes de cambiu climáticu que yá hai con toles empreses industriales y de tou tipu. Sí ye verdá qu’hai dalgunos NFTs con una güelga de carbonu bien baxa, pero son exemplos cuntaos, y desgraciadamente esta nun ye la norma xeneral.
Equí, namás son dos de la montonera de problemes que supón esto. Esti mercáu al alza namás funciona cola especulación y cola esperanza de muncha xente de sacar perres de too esto, pero la dura verdá ye que namás qu’unos pocos van sacar ganancies, y son los mesmos qu’intenten vendelo como’l meyor inventu y adelantu de la hestoria, cola perda de munches perres por parte de persones que creyíen nesta xera nel momentu qu’esta burbuxa d’especulación al rodiu de les cryptomonedes, NFTs o delles xeres que de xuru saldrán, esplote y arrase con tol sistema qu’hai con estos productos. Más qu’una nueva oportunidá de facer perres invirtiendo, ye la nueva estafa piramidal.
