Torna Xixón Fala en 3. El plazu de presentación de solicitúes pa participar nel concursu, entamáu pola Oficina de Normalización Llingüísticia, remata’l 5 d’avientu. El concursu Xixón Fala en 3 va consistir nuna competición, n’asturianu dafechu, onde se va presentar un tema, una idea, una investigación, un proyeutu, un problema social, etc. con munchu procuru y cola mayor calidá llingüística posible énte un públicu non especializao, xeneralista y variao.
Van poder presentase a esti concursu persones mayores d’edá (nos apartaos A y B) y persones d’ente 14 y 18 años (nel apartáu C), con esplicaciones comunicatives curties d’estremáu calter y que respuendan al enfotu del concursu. Los temes a tratar nel concursu van tener un rexistru cultu o académicu: hai que lu respetar y preparar el tema acordies con ello.
Esti concursu ofrez a la ciudadanía una ocasión única pa perfeicionar les sos aptitúes de comunicación n’asturianu. L’eventu tien por oxetivu algamar cotes altes de prestixu y normalización en tola comunidá asturfalante. No que cinca al públicu, ye una perbona manera d’abrir mires y d’averase a un conocimientu, anque seya esbozáu, de temes mui estremaos.
Los temes que se van presentar divídense en tres estayes: temes venceyaos a la cultura y la realidá asturiana, temes de divulgación, y la mocedá fala en 3, pa persones de 14 a 18 años. L’actu públicu de presentación de los temes va ser el sábadu 14 d’avientu nel Salón d’Actos del Centru de Cultura Antiguu Institutu (C/Xovellanos, 21), a les 11.00 hores. Van concedese tres premios en cada estaya: primer premiu: 600 euros, segundu premiu: 275 euros y tercer premiu: 125 euros.
