Llaboral Cinemateca entama una nueva convocatoria del programa Curtiumetraxes Llaboral Cinemateca, una iniciativa dirixidaa a los creadores cinematográficos asturianos o con residencia nel Principáu d’Asturies, qu’arranca col oxetivu de servir de plataforma pa la promoción y distribución de la producción rexonal de curtios en certámenes cinematográficos nacionales ya internacionales. Llaboral Cinemateca ye l’espaciu dedicáu al sector creativu cinematográficu y audiovisual promovío pola Conseyería de Cultura, Política Llingüística y Turismu, al traviés de Llaboral Ciudá de la Cultura.
Esta nueva convocatoria ta abierta a tolos trabayos con fecha de producción posterior al 1 de xineru de 2020 que tean inscritos na web de Llaboral Cinemateca (www.laboralcinemateca.es) enantes de les 12:00 horas del llunes 15 de payares. La duración de los curtios tien que ser inferior a 50 minutos y tienen cabida los trabayos de cualesquier xéneru y temática.
Los curtios que s’inscriban van pasar a formar parte del Archivu xeneral de curtiumetraxes asturianos, que Llaboral Cinemateca pon a disposición de programadores, investigadores, profesionales y aficionados, y van formar parte, amás, del Archivu del Curtiumetraxe Español qu’ellabora la Coordinadora del Curtiumetraxe Español.
Na selección de curtiumetraxes va valorase la orixinalidá y el riesgu de la propuesta, la calidá artística y técnica del trabayu y la participación significativa d’equipu técnicu y actores asturianos. Los curtios seleccionaos pola comisión valoradora van pasar a formar parte del Catálogu de distribución de Llaboral Cinemateca que, mientres dos años, va encargase de la inscripción y presentación curiada y personalizada de los trabayos nos eventos y festivales más destacaos.
La documentación y materiales requeridos, y tamién les bases completes d’esta nueva convocatoria tan disponibles en www.laboralcinemateca.es.
