“Nun va haber zona azul en tola ciudá”

0
679

La zona azul nun va llegar a tola ciudá. El conceyal de Mediu Ambiente y Movilidá, Aurelio Martín, aseguró esti llunes que les nueves zones de la ORA van establecese con «consensu políticu y social, y baxu criterios técnicos de movilidá”. L’edil d’Izquierda Xunida fizo estes declaraciones mientres la presentación de los nuevos parquímetros intelixentes que se van instalar progresivamente na ciudá. En total van ser 230 y van sustituyir a los esistentes hasta agora.

Martín esplicó que se trata de parquímetros “de nueva xeneración” con un costu de 6.000 euros por unidá. Cunten con una pantalla táctil que dexa tolos medios de pagu, el cambéu de les tarifes o la comunicación en tiempu real al traviés de cualquier rede móvil. Los parquímetros, que yá funcionen en ciudaes como Cartagena y Granada, van empezar a instalase en Laviada. El conceyal refugó que la ORA «nun ye un preséu de recaldación, sinón de regulación de los aparcamientos y de la movilidá na ciudá».

El conceyal, nuevu presidente de la Empresa Mixta de Tráfico, tamién presentó los dos vehículos 100% eléctricos de la empresa. Dambos van sirvir de sofitu a los parquímetros y al trabayu de los controladores. Tienen un costu de 50.000 euros caún, pero “en nengún casu van sirvir pa multar”. Estos vehículos yá funcionen en ciudaes como Donostia, Irún, Madrid, Uviéu y Toledo. Realicen llectura de matrícules de vehículos estacionaos y en movimientu en sentíu bidireccional, tantu de día como de nueche. Amás, van poder informar en tiempu real del nivel d’ocupación na vía pública al traviés d’una serie de paneles informativos.