Quien nel so día fuera líder de Desakato, Pablo Martínez, ye güei Pablo Senator. “La mano en el fuego” ye’l so primer álbum. Unu de los discos independientes que más van dar que falar no que queda de 2024 y en tou 2025.
Cuando Desakato dixeron adiós con sold out nos sos conciertos del Palau Sant Jordi y del Wizink Center de Madrid, “La mano en el fuego” yera una realidá. Un discu grabáu y guardáu. Un discu al que lu aguardaba y aguárda-y un futuru grande y prometedor. Pablo Senator ye dende güei una auténtica realidá cola edición d’esti discu. Un discu que tien na melodía la mayor diferencia y el denominador común cola so anterior esperiencia artística. “La mano en el fuego” ye un discu llenu de sensibilidá y llenu de ruíu. Llenu de melodía, d’arreglos, d’harmonía y de mensaxes que faen mover la to mente n’espirales llaberíntiques que t’atrapen hasta nun poder más qu’abrazar esos cantares que formen esti primer llargu.
Producíu por Manuel Cabezalí (Havalina) y Víctor Cabezuelo (Rufus T Firefly), Pablo Senator lleva presentándose en sociedá mientres meses cola so banda, de la que formen parte estos prodixosos músicos. “Motorizados”, “Subir a primera”, “Las Águilas” o “Stalingrado” fueron los singles escoyíos p’amosar el nuevu proyectu de Pablo Martínez. Un proyectu nel que, de nuevu, l’asturianu devuélvenos a los terrenes sensibles (nel más ampliu espectru del so significáu) onde la emoción te mece nuna especie de valse cantábricu.
