El paru rexistráu amenorgó en mayu n’Asturies en 2.159 persones, según los datos publicaos esti martes pol Ministeriu de Trabayu. Con esti descensu, el país suma 68 meses de descensu interañal consecutivu y el númberu de persones desemplegaes amenorga a 70.197, la cantidá más baxa pa un mes de mayu dende 2008.
La cayida del paru, equivalente a un 2,98%, foi xeneralizada: afectó a homes y muyeres, a toles edaes y tolos sectores. Sicasí, en términos interañales destaquen les baxaes na construcción (-12,5%) y la industria (-8,7%). Al respective d’abril, los descensos más importantes produxéronse ente los menores de 25 años, l’agricultura, la industria y la construcción.
Con estos datos, Asturies tien güei 3.423 persones en paru menos que va un añu. L’amenorgamientu porcentual asitiáse nun 4,65%. Mayu tamién foi positivu pa l’afiliación a la Seguridá Social: creció un 0,68% y Asturies cunta güei con 366.921cotizantes, 2.484 más que’l mes pasáu. En términos interañales, la medra elévase a 4.289 persones (un 1,18% más).
«Estes cifres señalen un bon comportamientu del mercáu de trabayu n’Asturies en mayu, nel mesmu enclín d’años anteriores, y amestáu a distintes actividaes qu’evidencia un mayor dinamismu económicu na comunidá», manifestó Luisa Pérez, directora xeneral del Serviciu d’Empléu del Principáu (Sepepa).
