La comisión permanente del Conseyu del Patrimoniu Cultural d’Asturies dio güei lluz verde al proyectu de rehabilitación del campanariu y la torre de la catedral d’Uviéu. El director xeneral de Cultura y Patrimoniu, Pablo Llión Gasalla, presidió la sesión na que s’aprobó’l plan de restauración del campanariu de la torre gótica, que la so execución va facer posible la realización de visites empuestes.
El proyectu, promovíu pol cabildru y redactáu pol arquiteutu Jorge Hevia, va suponer la llimpieza de los panales interiores, pechinas y mechinales del cuerpu del campanariu, según el saniáu y restauración de zones puntuales de les fábriques pedreses de los ventanales góticos.
Amás, los trabayos van dexar recuperar y esponer al públicu la maquinaria del reló de la torre, una pieza diseñada pol prestixosu reloxeru Ramón Durán en 1787. Un técnicu especialista va llimpiar los engranaxes, engrasará los mecanismos y exes y va tratar tolos metales pa protexelos del escomiu. El proyectu preve actuar tamién sobre la caseta de madera qu’alluga’l reló y la so estructura metálica.
Les siete campanes de la torre gótica de la catedral van llimpiase y les estructures de madera que les soporten van tratase con aceite de llinaza y barniz. A lo último, les escaleres y suelos del primer pisu van reparase y van instalase pasamanes y nuevu llume p’ameyorar l’accesibilidá del espaciu.
La rehabilitación del campanariu y la torre gótica inscríbese nel Plan Director de la Catedral d’Uviéu, que les sos obres arrincaron en 1996 y suma yá 24 actuaciones financiaes pol Gobiernu d’Asturies y l’Executivu central.
