La cantante y escritora estauxunidense Patti Smith foi gallardonada col Premiu Princesa d’Asturies de les Artes 2026, según fixo públicu güei’l xuráu encargáu de la so concesión.
Patricia Lee «Patti» Smith (Chicago, EE. XX., 30 d’avientu de 1946), cantante, compositora y poeta, conocida como «la madrina del punk», aportó a esti movimientu un puntu de vista intelectual y convirtióse nuna de les artistes más influyentes de la música rock. Creció en Filadelfia y Woodbury (Nueva Jersey) y, tres graduase na escuela, empezó a trabayar mui moza nuna fábrica de xuguetes poles dificultaes económiques que taba atravesando la so familia. En 1967 treslladóse a Nueva York y trabayó como vendedora de llibros, articulista y autora de cantares y teatru, animada pol dramaturgu y actor Sam Shepard, col que escribió Cowboy Mouth (1971). Tres una estancia en París, en 1971, de vuelta en Nueva York grabó delles canciones con Allen Lanier, del grupu de rock Blue Öyster Cult.
Convertida nun referente cultural de les últimes cinco décades, la trayectoria de Patti Smith trespasó, según los especialistes, les llendes de lo estrictamente musical pa convertise nuna comunicadora multidisciplinar ya iconoclasta al traviés de distintes manifestaciones artístiques como la poesía, la fotografía, la performance o la videoinstalación. Dotada d’un carisma estraordinariu, Smith amestó, amás, les sos propuestes al compromisu con distintes causes polítiques y sociales y ye considerada un iconu del activismu y la llucha polos derechos civiles.
En 1974 grabó’l so primer cenciellu col Patti Smith Group, Hey Joe / Piss Factory (1974). En 1975 el grupu saltó a la fama col so álbum Horses, que fusionaba punk rock y poesía falada. Patti Smith Group publicó tamién Easter (1978) y Wave (1979). Easter contenía’l so ésitu «Because the Night», escritu en collaboración con Bruce Springsteen. Nos años ochenta, Patti Smith vivió prácticamente retirada de la música, hasta qu’en 1988 publicó Dream of Life. En 1995, un añu dempués de la muerte del so home y del so hermanu, fixo una xira xunto a Bob Dylan (Premiu Princesa d’Asturies de les Artes 2007) y en 1996 volvió trabayar cola so banda habitual grabando Gone Again. A esti trabayu siguiéron-y los álbumes Peace and Noise (1997), Gung Ho (2000), Land (1975-2002) (2002) y Trampin’ (2004), y en 2005 reeditó Horses, grabáu en directo nel Festival Meltdown de Londres. Dellos de los sos últimos trabayos son Twelve (2007) y Banga (2012).
Influyida pola obra de la xeneración beat estauxunidense, dexó tamién patente’l so gustu pola poesía francesa del sieglu XIX, especialmente pola de Arthur Rimbaud, Charles Baudelaire y Paul Verlaine, mesmo que la so devoción por autores como Federico García Lorca o’l chilenu Roberto Bolaño, pa quien compunxo una canción. En 1972 publicó’l so primer poemariu, Seventh Heaven, al que siguieron Witt (1973), kodak (1977), Babel (1978), Woolgathering (1992), Early Work (1994), The Coral Sea (1996) (El mar de coral, 2012) y Auguries of Innocence (2005) (Augurios de inocencia, 2019), ente otros. Como narradora publicó dellos llibros de memories, especialmente celebraos pola crítica, como Just Kids (Éramos unos neños, 2010), col que llogró’l National Book Award d’Estaos Xuníos, M Train (2015) y Year of the Monkey (2019) (L’añu del monu, 2020). En 2025 publicó l’últimu volume d’esti xéneru, Bread of Angels (Pan d’ánxeles).
Smith volcó tamién el so talentu artísticu na fotografía y n’otru tipu de disciplines. Llevó alantre esposiciones y publicó’l llibru d’imáxenes A Book of Days (2022) (El llibru de los díes, 2023), y a finales de 2022 espunxo nel Centro Pompidou de París una instalación visual y sonora inspirada en Rimbaud, Artaud y Daumal. Anguaño, sigue realizando conciertos y recitales de poesía y collaborando con artistes de distintos ámbitos, como’l grupu Soundwalk Collective, col que mientres 2024 presentó por escenarios y centros culturales de tol mundu «Correspondences», una pieza entemecida d’arte audiovisual y performance qu’avisa sobre la crisis climática. Continúa con una estensa xira de conciertos per tol mundu, entamada l’añu pasáu, pa conmemorar el quincuaxésimu aniversariu del discu Horses.
Comendadora de la Orde de les Artes y les Lletres (Francia, 2005), Medaya d’Oru al Méritu nes Belles Artes d’España (2019), Oficial de la Lexón d’Honor de Francia (2022) y doctora honoris causa pola Universidá de Columbia (EE. XX.), en 2007 foi incluyida nel Salón de la Fama del Rock. En 2011 recibió’l Premiu Polar de la Música (Suecia) y en 2020 l’International Humanities Prize de la Universidá de St. Louis (EE. XX.). En 2021 el so discu Horses entró na llista del Grammy Hall of Fame. Esi mesmu añu recibió la Medaya de la Ciudá de Nueva York.
