Podemos-Equo sollerta de l’alta mortalidá nel albergue de Serín

La coalición pide un estudiu independiente sobro la situación de la instalación

0
107

L’alta mortalidá nel albergue de Serín preocupa a les protectores d’animales. Dende 2016, la mortalidá de gatos y perros na instalación, xestionada por Fundación Amigos del Perru al traviés de dos concursos públicos socesivos, aumentó drásticamente. Asina, los datos públicos del Portal de Tresparencia reflexen que, de 8 perros y 18 gatos finaos en 2016, pasóse a 62 perros y 59 gatos el pasáu 2018, casi quintuplicando cifrar total.

«Esto, xuníu al desfase nel conteo d’exemplares, fai que sía necesariu un estudiu independiente qu’esclarie la situación de la instalación lo más llueu y garantizando que se realiza con independencia, exhaustividad y rigor”, señaló Alba González Sanz. La conceyala de Podemos-Equo ufiertó una rueda de prensa al pie de integrantes de les protectores Xixón Felín, Rescate Animal Xixón, la Protectora d’Animales del Principáu d’Asturies y l’Asociación de Voluntarios polos Animales.

Mortalidá nos felinos

Estos datos son especialmente esmolecedores al respective de los felinos. «Si se tomen en considerancia’l porcentaxe de felinos finaos en relación coles entraes, pasóse d’un 18% nel 2016 a un 27% nel 2017, un 22% nel 2018 y un 45% de muertes nos datos publicaos de 2019. Si tenemos en cuenta los datos de salida, la mortalidá de los gatos nel albergue de Serín ye del 52%», señaló la edil.

La coalición morada y verde yá denunciara qu’ente los años 2016 y 2018 hai un desfase del númberu d’animales nel albergue. «Nun hai noticia de siquier un centenar de gatos y perros en dichu períodu», recuerda Alba González Sanz. Les asociaciones y protectores del conceyu de Xixón vienen espresando de forma repitida nos últimos años la so alarma énte estos datos ya inda nun s’esclariaron les razones d’este descuadre.

Desfase nel conteo d’animales

«El contéu escrupulosu de los animales, según la garantía de les sos condiciones d’hixene y salú, son dos obligaciones del beneficiariu de la concesión que podríen tar n’entredichu a tenor de los datos”, afirmó la edil. Por ello, va formular un ruegu na comisión de Seguridá y Mediu Ambiente pa solicitar la investigación independiente de la xestión del albergue. Amás, va pidir que se dispongan los fondos necesarios pa la contratación y realización del informe independiente nun plazu máximu de cuatro meses. “Una vegada rematáu, les resultancies tendrán de faese públicos y tomar les midíes oportunes na instalación”, añedió la conceyala.