La vocera de Podemos nel Conceyu de Xixón, Olaya Suárez, va preguntar al gobiernu municipal na sesión plenaria del día 12 pola constante espansión de les terraces d’hostelería y les sos implicaciones sobre l’usu y esfrute del espaciu públicu. En concretu, dende la formación morada quier pescudase sobre la vixilancia y siguimientu que se fai sobre’l cumplimientu de la ordenanza municipal de terraces y les sanciones emitíes al respectu nel últimu añu. De la mesma, Suárez va preguntar cómo se garantiza’l predominiu del interés públicu sobro la esplotación privada del espaciu públicu a la de conceder o refugar la instalación de terraces.
Olaya Suárez alvirtió esti xueves que “nun puede ser qu’en tolos barrios repitan les mesmes quexes, que se resumen en que tenemos ceres intransitables”. La vocera morada esplica que “evidentemente la instalación de terraces ye compatible cola convivencia y naide desea la so eliminación, nin tanto, pero sí’l cumplimientu de la ordenanza correspondiente”. Pa Suárez, “tien qu’haber un control pa que nun haya una privatización del espaciu públicu y pa que pasiar peles nueses cais nun se convierta nuna yincana”.
La conceyala de Podemos abonda en que “al yá amenorgáu espaciu pa peatones nes nueses cais, que recordemos que ye alredor del 30% frente al 70% que tienen los vehículos, tenémos-y qu’añedir tamién la ocupación por terraces”, que tien implicaciones non solo sobre la comodidá xeneral de los y les peatones, sinón tamién sobre l’accesibilidá pa les persones con movilidá amenorgada y el tránsitu de los servicios de llimpieza o emerxencies.
L’actual ordenanza reguladora de la instalación de terraces d’hostelería establez, ente otros criterios, que tienen d’asitiase xunto al borde la cera frente a la fachada del establecimientu ensin superala en llargor y separaes 0,50 metros del bordiellu; dexar un anchu de camín llibre mínimu de 1,80 metros, con un anchu máximu de la terraza que nun va poder superar la metá del anchu de la cera o espaciu piatonal nel que s’asitia; y nun instalase en ceres d’anchu inferior a 3 metros nin en llugares onde nun quede garantizáu’l predominiu del interés públicu frente a la esplotación por un priváu d’un bien públicu.
