Podemos Xixón reclama al gobiernu municipal “programes, incentivos y midíes específiques” pa que dende esti mesmu añu les iniciatives privaes culturales y d’ociu que cuenten con sofitu económicu del Ayuntamientu tengan que promover l’usu del asturianu.
Esti ye l’envís d’un ruegu que va defender la vocera de Podemos nel Ayuntamientu de Xixón, Olaya Suárez, nel Plenu del miércoles 15 de xineru. El testu de la iniciativa plantea qu’estos eventos incorporen l’asturianu como llingua vehicular de delles de les sos actividaes, la presencia d’artistes qu’empleguen l’idioma y la espublización de materiales promocionales y de comunicación n’asturianu, con especial atención al ámbitu del ociu infantil y familiar.
Según desplica Suárez, “trátase namás que de cumplir colo que diz el Plan de Normalización Llingüística, non solo na so última edición, sinón tamién nes anteriores”. Esti documentu, aprobáu pol propiu Plenu municipal, establez los oxetivos de “implicar al texíu asociativu y sociocultural xixonés na promoción social del asturianu” y “proporcionar recursos que faciliten l’usu del asturianu per parte d’asociaciones, coleutivos socioculturales y entidaes deportives”.
D’esta manera, Podemos reclama que “ye tiempu de que la normalización llingüística seya un criteriu de verdá a la hora de prestar el sofitu del Ayuntamientu, y d’igual manera, hemos de poner de la nuestra parte ufriendo los recursos de los que disponemos, como’l llabor de la Oficina de Normalización Llingüística”.