Los voceros de los grupos municipales d’Izquierda Xunida-Más País-Izquierda Asturiana y
de Podemos Xixón, Javier Suárez Llana y Olaya Suárez, espresaron esti miércoles la so esmolición poles nueves informaciones publicaes sobre graves problemes de salobridá nos servicios de Serunion, la empresa axudicataria de los comedores escolares en Xixón. Nesta ocasión trátase de l’apaición de larves de merucos na comida d’ocho colexos de La Rioxa. Dambes formaciones denuncien que la empresa yá tuvo detrás d’un escándalu similar con bárabos na comida del Hospital de Llión fai solo unos meses, arriendes d’otros anteriores en centros escolares de La Rioxa y Castiella y Llión.
Olaya Suárez, de Podemos, sostuvo que yá nun se trata de valoraciones que puedan considerase suxetives, los merucos na comida nun almiten relativización”, y espresó la so medrana por qu’acabemos llevando un disgustu similar nes nueses escueles, viendo les quexes que nos treslladen les families y l’historial que tien la empresa”. Poro, la conceyala morada declaróse “asustada cola pasividá del equipu de Gobiernu cuando falamos de lo que comen acaldía miles de neñes y neños na nuesa ciudá”, recordando que yá presentó iniciatives na Comisión municipal de Servicios Sociales y nel Plenu del Conceyu de setiembre sobre esta cuestión.
Javier Suárez Llana, d’IX-MP-IAS, manifestó que nun nos sirven les tibieces nun tema como esti; el Gobiernu municipal nun puede siguir resalvando una situación que xenera quexes toles selmanes”, polo que pidió a la conceyala d’Educación qu’estudie alternatives
a la prórroga del contratu con Serunión qu’anunció nel Plenu de setiembre. El conceyal aseveró que l’alimentación de los y les escolares “nun puede tar en manos d’una empresa privada que demuestra nun cumplir coles normes de seguridá alimentaria”.
Énte la gravedá y la reincidencia de los fechos, Suárez Llana reclamó al Gobiernu municipal “una alternativa vidable a la espera de que se meyora na definición d’un nuevu modelu de comedores escolares de xestión pública”, xuna reivindicación na que coinciden dambes fuerces polítiques. Asina, dende IX-MP-IAS propónse “consensuar coles comunidaes educatives un modelu que recupere les cocines o que cree una cocina municipal” pa garantizar “alimentación calidable y un serviciu de comedor que forme parte del proyectu educativu de cada colexu”. Per parte de Podemos Xixón, Olaya Suárez defendió que “el meyor forma d’asegurar la calidá y la salobridá ye apostando por cocines de proximidá, en llugar de comida esfrecida fecha en macroinstalaciones en Valladolid”, tal que vien proponiendo el so grupu acordies con espresar dende les AMPAs de la ciudá.
