L’Institutu de Desenvolvimientu Económicu del Principáu (Idepa) apurrió esti vienres los sos premios. Los galardones fomenten les meyores práctiques de les empreses asitiaes na comunidá. Anguaño reconocen el llabor de Hierros y Aplanaciones (Hiasa), Asturmadi Doors e Izertis. Mientres l’actu, celebráu nel Muséu de la Minería y de la Industria, el conseyeru Isaac Pola destacó l’esfuerzu, el compromisu y l’apueste decidíu pola calidá, la excelencia, la innovación y l’espansión internacional de les compañíes galardonaos.
Pola refirióse a les firmes escoyíes como exemplu de «empreses competitives, dinámiques, innovadores y internacionalizadas». Destacó qu’estes cualidaes reflexen «l’esfuerzu y l’escelente nivel del texíu granible asturianu». Pela so parte, la directora xeneral del Idepa, Eva Pando, destacó l’eleváu nivel de digitalización y diversificación de les galardonaes.
Estos galardones, creaos 1984 quieren potenciar les iniciatives destacaes de les empreses allugaes n’Asturies
El Idepa convoca añalmente, dende 1984, los premios a la xestión empresarial innovadora en distintes modalidaes, coles mires de potenciar iniciatives destacaes de les empreses allugaes n’Asturies.
El Premiu a la Innovación ye para Hiasa, empresa del Grupu Gonvarri que desenvuelve una importante política d’I+D+i. La compañía destaca pol so efectu tractor sobro’l conxuntu del texíu industrial rexonal. Collabora estrechamente con distintes firmes de la so redolada na busca de soluciones innovadores, tratando de resolver los retos que se plantegen nel so sector. Amás, la so exemplar trayectoria y la so acertada visión estratéxica dexáron-y competir nel mercáu nacional ya internacional. Ta presente en sectores como la automoción o les enerxíes anovables.
Asturmadi Doors foi la firma galardonada col Premiu a la Internacionalización. Na so trayectoria destaca la vocación por enllantase en nuevos mercaos, un propósitu primordial na so estratexa empresarial. La firma cunta con una destacable capacidá pa identificar nuevos nichos de mercáu nel ámbitu internacional, afaciendo la so actividá a la demanda.
El Premiu a la Crecedera Empresarial recayó n’Izertis. La compañía xixonesa supo tresformase dende los sos oríxenes pa convertise nuna inxeniería na que trabayen 900 persones. Cunta con delegaciones en siete países y presencia en 35 naciones. Nel últimu llustru esperimentó un aumentu esponencial del empléu ya intensificó el so apueste pola innovación.
