Dende 2009, añalmente cellébrase’l Premiu de Lliteratura de la XE, como reconocencia a los meyores autores nuevos europeos asina como la diversidá llingüística nos países que participen nel programa Europa Creativa. Ye una iniciativa de la Comisión Europea que quier afondar na promoción d’autores y l’intercambiu d’autores y llibros na XE.
El premiu y los autores promocionen a lo llargu l’añu a nivel llocal, estatal, européu ya internacional, n’eventos en llibreríes, feries de llibros y festivales lliterarios. Amás sofita les tornes de les arees llingüistiques más pequeñes a les más grandes.
España algamó los premios nos años 2010, 2013, 2016, 2020 y 2022 xunto a otros estaos. Cuatro años con obres en castellanu y unu en catalán. Fai falta que pola mor de los oxetivos d’esti premiu España presente obres nes otres llingües que cohabiten nella, incluyíu l’asturianu. D’esta miente, espeyaríase la bona lliteratura del país y la so visibilización de la creación n’asturianu nel campu cultural del continente.
Ye perimportante la interrellación de les lliteratures nacionales europees y el so espardimientu al traviés de la presencia nos foros lliterarios internacionales y la torna a otros idiomes. Europa forma una potencia cultural que precisa d’autoconocencia de les sos producciones a lo llargu’l so territoriu. Nesti Premiu de Lliteratura de la XE participen 41 estaos, lo que-y da una proyeición pergrande a les llingües menos espardíes.
Esperemos que surda dalgún añu un referente asturianu pal conxuntu del ámbitu lliterariu européu per aciu d’esti Premiu. Sedrá bienllegáu y un argumentu más p’algamar la oficialidá de la llingua asturiana ente’l restu d’idiomes de los estaos que collaboren na xera cultural europea.
