Esta mañana, el Conseyu Regulador de la DOP Sidra d’Asturies foi escenariu de la presentación de la campaña de branu de los productos amparaos dientro de la Denominación d’Orixe Protexida. El lema escoyíu foi ‘Xirar antes d’echar’. Na presentación tuvieron presentes el presidente del Conseyu Regulador de la DOP Sidra d’Asturies, Guillermo Guisasola; el xerente de la entidá, Daniel Ruiz; la directora xeneral de Desenvolvimientu Rural y Agroalimentación, Begoña López; el director de l’axencia creativa Arrontes y Barrera, Luis Arrontes; y la directora de medios d’esta compañía, Elide García.

“Ye una campaña innovadora. Rompióse cola tradición”, reconoció Guillermo Guisasola. Pela so parte, Luis Arrontes, responsable del diseñu, esbilló les virtúes d’esta campaña. “Quixímos facer un diseñu que llame l’atención, reconocible y sostenible nel tiempu. Basemos na etiqueta y nel escanciáu, los dos elementos diferenciadores d’esti productu. Tratase d’una ilustración 3D, que ye enclín nel mercáu. El verde y l’azul son el colores predominantes”, describió.

La estratexa de medios, esbillada por Elide García, ta dirixida a consumidores, chigreros y productores. Va tar presente en televisión, radio, prensa, medios online y soportes offline (mupis, marquesines y autobuses), del 10 de xunu hasta la última selmana de setiembre.

Pola so parte, la directora xeneral de Desenvolvimientu Rural y Agroalimentación, Begoña López, punxo en valor la importancia d’apostar pol productu autóctonu. “Tenemos de siguir trabayando nestes sinerxies ente los sectores público y privao. Creo qu’esta campaña fidelizará al consumidor habitual y va espertar un mayor interés nel públicu más nuevu. Apostar pola DOP Sidra d’Asturies ye facelo pol orixe y la calidá”, concluyó.