Yá van unos meses dende que llegó a llibreríes ‘No hay país’ (Hoja de Lata, 2022), de Xuan Cándano, un títulu imprescindible que vien pa cubrir un ñeru vacíu nel relatu d’esta tierra.Un analís en clave asturiana de lo asocedío nel ámbitu políticu, social y cultural n’Asturies nos últimos 47 años. El próximu vienres 31 de marzu va presentase en nel Llar La Llegra y acompañará al autor Xicu Ariza.
Ente la muerte de Franco y la descarbonización trescurre la hestoria recién d’Asturies. Ente Rafael Fernández, el primer presidente del gobiernu preautónomico asturianu, y Rodrigo Cuevas, el músicu y agitador cultural de lligueru y montera, concéntrase’l postrer mediu sieglu de la nuesa tierra.
Asturies recuperó la so vida democrática en 1978 col regresu de Rafael Fernández, antiguu miembru del Conseyu Soberanu d’Asturies y Llión que partió al esiliu en 1937. A la so llegada, Fernández atopóse una tierra con una industria pesao entá relevante y una lleenda de resistencia sol franquismu. Nel 2018 la minería del carbón echó’l zarru y agora les principales lleendes son les urbanes, empuestes a la emigración. Entrín y non, cuatro décades llargues d’ensayos y erros nes qu’Asturies nun paez atopar una nueva identidá tres l’esbarrumbe del moviento obreru que lu vertebraba.
El periodista Xuan Cándano propúnxose enllenar un incomprensible vacíu ensayístico avera del aportar d’esti pequenu rincón del Atlánticu y la resultancia ye No hay país. Crónica política (y sentimental) de Asturies (1975-2022). Un rigorosu acercamientu al pasáu inmediatu de la nuesa tierra pal qu’entrevistó a más d’un centenar de los sos protagonistes y consultáu con rigor les fontes documentales.
