Iniciativa pol Asturianu y el Conseyu de Mocedá de Xixón (CMX) recuperen los grupos de conversación informal n’asturianu. Estos grupos, de baldre y nos que nun importa’l nivel d’usu o conocencia, tán empobinaos a toles persones que necesiten d’un espaciu informal, relaxáu y seguru onde quitar el mieu a falar n’asturianu en públicu.
Los grupos informales de conversación son una iniciativa del CMX col envís de que la xente pierda’l mieu a falar n’otros idiomes como’l francés, l’inglés y l’alemán. Resulta, entós, perinteresante usar estos espacios como sitios seguros onde l’asturianu medre ensin tar estigmatizáu, p’amosar que se pue falar n’asturianu en toles situaciones sociales, seya cola familia o na cai, nel supermercáu o colos amigos.
Pa facilitar la participación a toles persones interesaes, nesta convocatoria van facese dos grupos, ún va ser presencial y l’otru telemáticu. El primeru va aconceyar los llunes a les 17:00 hores nel llar del CMX, n’Avenida Manuel Llaneza, 68, baxu, 33208, en Xixón; mientres que’l segundu, destináu a toles persones que nun seyan a averase físicamente, va ser los martes a les 17:00 hores al traviés de la plataforma Zoom. Nesti últimu casu hai que rellenar un formulariu na páxina d’Iniciativa pol Asturianu.
El grupu de conversación n’asturianu presencial va entamar el llunes 5 d’avientu a les 17:00 hores. Per contra, el grupu a distancia va tener la primer sesión el martes 13 d’avientu tamién a les 17:00 hores nesti casu al traviés de Zoom.
