La conseyera de Presidencia, Rita Camblor, animó güei a la mocedá asturiana a participar na 32ª edición del programa de promoción de mozos creadores Culturaquí 2022, diseñáu pa impulsar les distintes modalidaes que conformen les artes plástiques, la lliteratura, el cine o la música ente menores de 35 años.

 

Na so visita a la esposición, EICON, pintura de Taller 3, na Sala Borrón d’Uviéu, Camblor animó a nuevos talentos a participar nun programa diseñáu especialmente pa la mocedá y de que les sos ediciones anteriores surdieron dalgunos de los meyores creadores del Principáu na actualidá”.

 

Culturaquí ye un mediu pa fomentar la participación de la mocedá con moliciones artístiques, espublizar estes manifestaciones y sirvir d’altavoz por que creadores y creadores espliquen a la sociedá, al traviés del arte y de la lliteratura, cuestiones como qué-yos esmolez, cómo se sienten o qué piensen”, precisó la conseyera. 

 

La participación ta abierta a cualesquier artista que naciera o more n’Asturies y que la so edá nun supere los 35 años a 31 d’avientu de 2022. Tamién pueden sumase descendientes hasta segundu grau d’emigrantes, lo cual dexó, dende 2008, internacionalizar el programa ensin arrenunciar a les bases d’asturianía sobro les que se sofita.

 

Culturaquí 2022 inclúi les siguientes convocatories:

 

  1. Muestra d’Artes Plástiques. A esta 32ª edición podrá presentase cualquier tipu de propuesta artística: pintura, escultura, fotografía, dibuxu, grabáu, instalaciones, videoinstalaciones, etcétera. Tantu la tema, como la técnica y los materiales van ser llibres. Un xuráu va escoyer un máximu de 6 artistes, caún de los cualos va recibir un premiu en metálicu de 500 euros, y que van formar parte d’una esposición colectiva en Sala Borrón n’ochobre. Amás, va concedese’l Premiu Asturies Nuevu d’Artes Plástiques, dotáu con 2.000 euros, y va entamase una esposición individual en Salar Borrón.

 

  1. Concursu de maquetes pa grupos pop y rock. El certame realizase en collaboración con Cadena Ser, 40 Principales Asturies y ta dirixíu a grupos o solistes de pop y rock. Va escoyese una maqueta ganadora, a la que va apurrise un premiu en metálicu de 3.000 euros que va tener de destinase a la edición d’un CD o un EP y un vídeu. Tamién podrán realizase una serie de conciertos de promoción. Van almitise grupos o solistes que nun editaren o autoeditado, nún o dellos soportes, un máximu de 12 temes. Va realizase una actuación de presentación del CD ganador nel primer semestre de 2023. El plazu para presentar les obres remata’l 30 de setiembre. 

 

  1. Premiu Asturias Joven de Poesía, Narrativa y Textos Teatrales. N’asturianu o en castellán, les obres ganadores van recibir un premiu de 1.000 euros y van editase dientro de la Colección Texu. Establécense trés modalidaes: poesía, narrativa (narraciones curties o novela curtia) y testos teatrales. El plazu ta abiertu hasta’l 30 de setiembre.

 

  1. Programa d’esposiciones d’artistes plásticos mozos na Sala Borrón. Podrá presentase cualquier propuesta artística (pintura, escultura, fotografía, instalaciones, videoinstalaciones, etc.) con llibertá pal tema, la técnica y los materiales. Los proyectos escoyíos van formar parte de la programación de Sala Borrón na temporada 2022-2023. El plazu de recepción de trabayos ta abiertu hasta’l 18 de payares.

 

  1. Premiu Nuevos Realizadores del Principáu, en collaboración col Festival Internacional de Cine de Xixón.Van almitise los proyectos pa curtiumetraxes de tema llibre que se desenvuelvan en castellán o asturianu y nun superen los 25 minutos. Tendrán d’incluyir guion de curtiumetraxe, presupuestu, plan de rodaxe, memoria de dirección, plan d’esplotación y formatu d’exhibición prevista, según cualquier fonte de financiamientu adicional, ente otros detalles. Establezse un premiu en metálicu de 5.000 euros y el proyectu premiáu va estrenase nel Festival Internacional de Cine de Xixón 2023. El plazu pa presentar los trabayos remata’l 7 d’ochobre.

 

  1. El Premio Astragal, dedicáu a proyectos artísticos (instalaciones, videoinstalaciones, acciones, intervenciones y otros procesos creativos) que se realicen espresamente pa la sala d’esposiciones Espaciu Astragal, del Centru de Recursos del Conseyu de Mocedá de Xixón. Cada artista o colectivu va poder presentar un proyectu creativu o obra diseñada específicamente pal espaciu que tendrán de ser orixinales ya inéditos. Establezse un premiu en metálicu de 3.800 euros. Les propuestes pueden presentase hasta’l 28 d’ochobre.

Premiu Realizadores contra la Violencia de Xéneru. Convocase en collaboración col Festival Internacional de Cine de Xixón pa promover actividaes artístiques como mediu pa sensibilizar a la ciudadanía sobro la llucha contra la violencia de xéneru. Van almitise proyectos pa curtiumetraxes que se desenvuelvan en castellán o asturianu y nun superen los 25 minutos. Los trabayos presentaos tendrán d’incluyir guion de curtiumetraxe, presupuestu, plan de rodaxe, memoria de dirección, plan d’esplotación y formatu d’exhibición prevista, cualquier fonte de financiamientu adicional, acreditación, plan, documentación ya información. Establezse un premiu en metálicu de 5.000 euros y el proyectu premiáu va estrenar nel Festival Internacional de Cine de Xixón. El plazu remata’l 7 d’ochobre.