Falamos con Rubén Bada de L-R, que presenten discu esti sábadu 10 na Sala Acapulco dende les 20.30 hores tres sacar güei’l que ye’l terceru discu d’estudiu, V.O.S.
Lleváis agora trés discos dende 2018 depués de colaborar n’abondos proyectos enantes de facer L-R, ¿cómo surdió la idea inicial?
Foi de forma bastante natural, tábemos na cocina casa y teniendo una discusión sobre si la música asturiana podía entemecese con otres músiques. Y yo dixi-y a Leti qu’una muñeira podía amestase con un blues perfectamente. Y púnxímonos a tocar y probando vimos que sí yera posible. La música asturiana ye tradicional, ye música que sal del pueblu, que sal de la tierra y que nun se diferencia, nesi sen, del restu les músiques populares del mundu. D’esa forma salieron dalgunos conciertos, falamos de preparar un repertoriu, preparámoslu y poco a poco, el proyectu conviritióse nel grupu que ye agora.
Cada vez tenéis más actuaciones y xeneráis mayor interés y atención tamién dende fuera, ¿qué sensación vos dio actuar, por exemplu, en Lorient o nel BBK?
Actuar fuera d’Asturies ye daqué que llevamos faciendo de forma natural dende siempre y sorpréndenos el fechu de que sorprenda. Cuando salimos fuera topámonos mui bien porque siempre nos sentimos mui comprendíos, mui arropaos y la xente anque nun entienden les lletres dafechu sí qu’entienden lo que ta pasando. Yo creo que cuando se fai la música d’una manera honesta y d’una forma auténtica, funciona.
A Lorient vamos dir per cuartu añu consecutivu, paez que-yos gustamos al públicu bretón y del intercélticu y ellí siempre ye un placer tocar. Nel BBK lo mesmo, al principiu la xente mirábanos con cara rara, pero después entraben por ello. Tuviemos n’otros festivales como l’Underneath Stars nel Reínu Xuníu y la xente acabó baillando una danza. Eso fala per si mesmo y la música y la llingua asturiana pueden viaxar.
Too entamó con Post-Folk Asturianu,¿cómo veis esti trabayu años después con más distancia y trayectoria?
Veo un discu demasiao visceral. Nun toi mui contentu con cómo suena, con cómo ta amestao y casi de xuru qu’esti añu tengamos un remaster del Post Folk Asturianu. En cuanto a la propuesta musical ye un discu que veo como dalgo mui honesto que nos representa mui bien, y ye una pena que nun suene al 100% de les posibilidaes del álbum. De fechu, lo que tamos intentando ye volver a esi espíritu de volver a facer les coses d’una forma muncho más personal y nun pensalo tanto.
Siguisitis con N.O.S., que contaba con colaboraciones con Silvia Quesada o Mapi Quintana, pero inclusive la portada yera una alusión al anterior, ¿cuál diriáis que ye’l sellu L-R?
El sellu L-R podría definise como un grupu que ye mayor que la suma de les partes. Tamos mui emperraos en siguir con esi discursu punk del “Failo tu mesma” que repite Leti constantemente. Esa idea de ser parte del tol procesu creativu, dende les idees iniciales hasta la grabación del discu, los arreglos, los videoclips, tol trabayu gráficu, el tipu de soníu y d’arreglos que queremos… Entós ye una cuestión que va de contar la nuesa verdá, de cómo ye la música tradicional asturiana y como nos rellacionamos con ella, de la forma más honesta y respetuosa posible.
L’álbum caberu ye V. O. S; nel crowdfunding dicíais que’l nome de V.O.S. que da nome’l títulu al álbum vincula tres conceptos importantes pa vos: “versión”, “orixinal” y “sotitulada”. ¿podéis contanos más?
V.O.S. ye la continuación d’esta idea. Si l’anterior yera N.O.S. que yera un trabayu que miraba un poco hacia dientro, esti fai lo contrario y pasa al V.O.S. y pasa a que seáis vosotros los qu’interpretéis el discu, saquéis les vuestres propies conclusiones y ehí entra’l xuegu de la versión orixinal sotitulada. Nosotros dámosvos la versión orixinal que puede ser la nuestra pero vosotros podéis entendelo como vosotros queráis porque entendemos que la música tradicional nunca ye nin orixinal, nin nunca ye inamovible, entós siempre va tener esi sotítulu que va ser cómo lo entienda’l públicu.
Si se vio’l videu de “L.luna” la xente va decatase qu’una cosa son los sotítulos y otra lo que tamos cantando; ye enredar con esa idea y facer pensar al rodiu d’eso. De si nos sotitulen y dan les clave de dalgo, a veces igual nos tan engañando y por el val más que volvamos nós a la versión orixinal y sacar les propies conclusiones que ye como entendemos la música tradicional. Hai quien nun entendió’l xuegu [rises] y pensó qu’estos sotítulos yeren un error… pero non ta fecho adrede pa facer a la xente recapacitar.
Son tamién perinteresantes les colaboraciones de la vuestra publicación última, ¿como foi colaborar con Los Hermanos Cubero? ¿Hai un puntu en común na renovación del folk con ellos?
Sí que tenemos una montonera coses en común, non nel soníu pero sí nel plantegamientu de pensar la música tradicional propia como parte d’un mundu global, que ye onde vivimos, y onde nun podemos escapar de les influencies que nos arrodien y bombardeen. Dicho lo cual, son dos seres humanos encantadores colo que ye un auténticu placer compartir música y conversación. Trabayar con xente asina da gustu.
Tamién tenemos nel discu Eva Tejedor y Les Pandereteres, que ye una persona cola que llevo trabayando dende va dellos años y que sería absurdo nun la tener. Tamién tenemos al percusionista Juanjo Díaz que ye compañeru míu na banda de Rodrigo Cuevas (¡tremendu percusionista!), tenemos a Ndiaz, que ye un grupu bretón que faen una revisión del so folclore qu’a nós encántanos y pensamos que teníamos de facer dalgo xunto…
Nesi sen, hai un anovador que nun se puede obviar agora mesmo, como nun se vos puede obviar a vós, esti ye Rodrigo Cuevas col que tenéis un cantar “L.luna” con Rodrigo Cuevas, ¿por qué creéis que tán funcionando tan bien?
A Rodri conocémoslu d’unos cuantos años tamién. Yo llevo andechando y tocando na so banda dellos años. Y, nesti momentu, tres de planteganos munches veces facer dalgo, llegaos a esti puntu onde ta espoxigando con esa velocidá decidimos que yera’l momentu enantes de que se convirtiera nun artista inalcanzable. Escoyimos esi tema y funciona porque ye un tema guapísimu que facemos dende’l corazón… y eso siempre funciona.
Falemos de Xixón, dende les instituciones dalgunos partíos tan faciendo declaraciones abiertamente escontra la música y llingua asturiana, ¿qué opináis? ¿qué podemos facer los creadores n’asturianu?
Nin los escucho, nun se meten solo col asturianu, sinón con tolo que seya distinto a ellos. Son xente que vive con mieu del que ta enfrente y espresen esi mieu con odiu. Lo que tenemos de facer los que creamos n’asturianu ye siguir creando n’asturianu, siguir usando l’asturianu: falando colos nuesos fíos, colos nuesos amigos, coles instituciones…lo que tenemos que facer ye usar l’asturianu. Si lo usamos, l’asturianu sigue vivu. Aportamos bayura, los demás aporten probeza.
Tocáis en Xixón na Sala Acapulco, un sitiu per onde pasó xente de muncho nivel, ¿cómo afrontáis el show del sábadu? ¿habrá sorpreses?
Ye una sala que nos presta muncho porque vimos ellí grupos mui guais ellí y hai sitiu pa baillar (yá sabéis que la música de L-R ta pensada pa baillar) entós ye un sitiu perafayadizu. Poque sorpreses tenemos, pero vamos tener dellos invitaos, vamos tener a Manu Molina (¡tremendu batería!) reforciando’l soniu de L-R, porque nesti discu les percusiones tienen bastante protagonismu entós va echanos un gabitu. Vamos montar una folixona al altor de lo que s’espera.
El sábadu va abrir el conciertu Ferla Megía, ¿qué podéis decir d’esti artista emerxente? ¿Cómo veis el panorama de la música asturiana actual? ¿dalguna recomendación n’especial?
El conciertu va abrilu Ferla Megía. Paeznos de lo más interesante d’esta nueva fornada de xente mozo. Tien una visión bastante particular de la música y de cómo entender la reellaboración de la tradición musical asturiana y pensamos que nos años vinientes va tener muncho que dicir. Tamos mui contentos de que nos dixera que sí ya igual hai dalguna colaboración nel conciertu porque nos presta cómo lo fai, cómo lo cuenta y él. Va ser una nueche redonda…
Esti sábadu 10, dende les 20:30 hores va tener llugar el conciertu-presentación del discu V.O.S. Pueden mercase les entraes de forma anticipada a un preciu de 12€ o na taquilla por 15€. Puede accedese a la venta online equí.
