La obra Estados de la emoción. La intelixencia emocional como utopía de cambéu, de l’artista asturiana Ruth Álvarez, Premiu Astragal 2022 contra la violencia sexista, va esponese na see del Conseyu de la Mocedá de Xixón a partir de mañana y hasta’l día 28.
El director xeneral de Mocedá, Diversidá Sexual y Derechos LGTBI, Marcos Torre, y Ruth Álvarez van inaugurar mañana, a les 19:00 hores, l’amuesa, integrada por cuatro instalaciones que recurren a la intelixencia emocional como manera de combatir la violencia machista y prevenir los problemes de salú mental.
Les instalaciones creaes para la Sala Astragal representen les emociones básiques: rabia, murnia, allegría y mieu, col enfotu de da-yos visibilidá nun planu plástico y visual que convida al espectador a identificales y llevales al territoriu que-y sía propiu.
Pa desenvolver esta propuesta, l’artista Ruth Álvarez cuntó col asesoramientu de dos comisaríes: Nuria Antolín y Mónica Zuazua, quien-y dieron soporte para contextualizar les obres y el discursu.
Ruth Álvarez (Uviéu, 1995) ye llicenciada en Belles Artes pola Universidá de Salamanca y cursó el Máster n’Estudios Avanzaos n’Hestoria del Arte pola Universidá de Barcelona. Amás, llogró la beca Atic, tamién na Universidá de Barcelona. Ye cofundadora de l’Asociación Cultural Flechazu y participó en diverses esposiciones colectives.
