El Serviciu de Salú del Principáu (Sespa) va aprovechar les xornaes de tarde p’aumentar l’actividá asistencial en ciruxía, pruebes, consultes y otros procedimientos como los vasculares intervencionistas o la hemodinámica, como parte del plan estructural de llistes d’espera que se va poner en funcionamientu nes próximes selmanes.
La conseyera de Salú, Concepción Saavedra, anunció güei na Xunta Xeneral que’l Boletín Oficial del Principáu (Bopa) va publicar mañana l’alcuerdu del Conseyu de Gobiernu qu’establez les condiciones por que los profesionales del sistema sanitariu públicu puedan percibir un complementu de productividá variable venceyáu a la medría d’actividá.
Esi alcuerdu garantiza’l financiamientu de los programes especiales, que van ser fundamentalmente de tarde y en módulos de cuatro hores, según les condiciones nes que podrán desenvolvese. El gastu envaloráu p’anguaño algama los 10,5 millones. Amás, facilita que los profesionales trabayen n’horariu de mañana y tarde, con meyores condiciones llaborales, de cuenta que esto redunde nun meyor curiáu de la salú de la ciudadanía y amenorgue’l tiempu máximu d’accesu a les prestaciones.
L’aprobación del alcuerdu ye un requisitu básicu pa convertir el plan de choque que s’empecipió en xunu nuna iniciativa estructural, capaz d’encetar l’amenorgamientu de los tiempos de demoranza de forma más eficiente y con midíes organizativas que puedan caltenese nel tiempu, actuando sobre la estructura de la organización.
Los cambeos fueron axustaos colos representantes de el trabayadores del Serviciu de Salú ya impliquen un mayor compromisu de los profesionales, yá que se desanicia la cuantía variable del complementu de productividá, qu’agora pasa a ser fixa.
Esta decisión va producir una medría considerable del númberu de programes que podrán realizase y del personal que va participar nellos, lo que resulta fundamental pa optimizar la xestión y garantizar que toles persones reciban l’atención afayadiza a la so patoloxía en plazos más curtios.
Con esti alcuerdu, les xerencies de cada área van poder proponer a la Dirección d’Evaluación Sanitaria del Sespa aumentar l’actividá cuando resulte necesariu p’amenorgar la llista d’espera.
Los programes especiales d’amenorgamientu de la demoranza van enllantase cuando los rendimientos en xornada habitual seyan satisfactorios pero non abondos pa garantizar los tiempos máximos de demoranza establecíos.
