El Principáu avanza na tramitación del conveniu cola Xunta de Galicia pa la prestación d’asistencia sanitaria en zones de llende de dambes comunidaes. La conseyera de Salú, Concepción Saavedra, informó güei na Xunta Xeneral sobre esti alcuerdu, que yá recibió’l vistu bonu del Conseyu de Gobiernu’l 19 de xunetu, como trámite previu a la so aprobación pol Senáu, últimu pasu antes de la firma.
“La tramitación d’esti conveniu evidencia la importancia de cooperar ente comunidaes fronterices en daqué tan esencial y necesario como la salú de les persones”, señaló Saavedra. “El Serviciu de Salú, como serviciu públicu, universal, accesible y de calidá, tien de procurar les meyores prestaciones a la so población”, amestó.
El documentu, consensuáu por dambes alministraciones, afecta a los vecinos de la parroquia de Os Coutos, en Ibias, que van poder recibir atención na provincia de Lugo, pol so mayor proximidá. Ellí van tener accesu a servicios d’atención primaria, urxencies, atención hospitalaria y tresporte sanitariu. Les localidaes que se beneficiaren del conveniu son les siguientes: Folgueiras Os Coutos, Lagúa, La Muria, Parada, Santa Comba Os Coutos, Valdeferreiros, Vilarello, Villaselande y Viñal.
En concretu, el conveniu asigna a estes poblaciones al centru de salú de Navia de Suarna, a la zona especial d’urxencies d’este mesmu conceyu (de 15:00 a 22:00 hores) y al puntu d’atención siguida de Becerrea (de 22:00 a 08:00 hores. Como centru de referencia establez l’Hospital Universitariu Lucus Augusti de Lugo.
L’alcuerdu, con una duración de cuatro años, preve que’l Serviciu Gallegu de Salú tenga accesu a les hestories clíniques de los pacientes y que’l Sespa compense a la sanidá gallega polos gastos en qu’incurra pol desplazamientu de los sos profesionales sanitarios o por necesidaes de refuerzu del so personal.
Pa beneficiase d’esti conveniu, ye necesariu que les persones interesaes llogren una tarxeta d’asistencia a movíos nel centru sanitariu gallegu más próximu a la so casa. Amás, van caltener la tarxeta sanitaria d’Asturies.
Nel casu de que precisen dalguna prestación ortoprotésica o terapia respiratoria domiciliaria, el pidimientu va realizalo’l facultativu qu’empreste l’asistencia y va tener validez n’Asturies, onde’l Sespa va encargase d’asumila y financiala.
El documentu tamién recueye la creación d’una comisión de siguimientu compuesta por cuatro miembros, dos de cada serviciu de salú, y un representante de caúna de les xerencies que se beneficien d’esti alcuerdu.
