La Conseyería de Salú afirma que la reordenación del mapa sanitariu va ameyorar l’asistencia, va potenciar los hospitales comarcales y va facer más curiosos pa los profesionales. Asina lo esplicó esta tarde la conseyera Concepción Saavedra tres axuntase colos representantes de los colexos profesionales del ámbitu sanitariu pa tresllada-yos la propuesta. La conseyera aseguró que “nun va haber nenguna torga” nes prestaciones y servicios de los centros de salú y hospitales comarcales, y qu’estos postreros van salir beneficiaos col nuevu mapa sanitariu, al aumentar la so cartera de servicios.
Otra de les ventayes de la reordenación alministrativa ye, según Saavedra, “que los centros hospitalarios comarcales van ser más afayadizos pa los profesionales sanitarios”. Amás, la conseyera de Salú pidió tranquilidá a los usuarios, que “nun van notar una diferencia. Van allegar al so centru de salú y hospital de siempre, y cuando la situación seya más complexa van allegar a un centru de mayor complexidá”. La intención ye “entainar los circuitos asistenciales” p’ameyorar l’atención sanitaria y amenorgar los tiempos de demoranza.
El gobiernu presentó’l pasáu sábadu la reorganización del mapa sanitariu y esta selmana empecipió una ronda de contactos con tolos axentes implicaos col enfotu de que’l documentu base llegue a la so fase de tramitación col mayor consensu posible. Tres la xunta d’ayeri colos sindicatos, la conseyera de Salú caltuvo un alcuentru colos representantes de los colexos profesionales sanitarios, que trescurrió en “un ambiente distendíu” y de “diálogu”.
