La Conseyería de Salú empecipia en cinco centros de salú del área sanitaria V, con cabecera en Xixón, un programa pioneru de farmacia comuñal en collaboración col Colexu Oficial de Farmacéuticos pa resolver incidencies cola receta lletrónica. El proyectu establez una nueva canal de comunicación directa ente les oficines de farmacia y los centros de salú cuando se detecten problemes que torguen al paciente disponer del so tratamientu, bien porque haya una dulda de dosificación o porque la receta tea caducada, ente otres causes.
El programa va resolver situaciones tanto por recetes non anovaes como dende’l puntu de vista clínicu, lo que va redundar nuna meyor atención a la ciudadanía. D’esta miente, les oficines de farmacia van comunicar la incidencia al traviés d’una ferramienta informática al médicu correspondiente pa solucionala ensin necesidá de que’l paciente se mueva al centru de salú y xenere cites presenciales.
Los centros de salú d’El Cotu, El Llanu, Llaviada y Calzada I ya II, qu’atienden a unos 100.000 habitantes, van ser los primeres d’Asturies en tener contactu directu con más d’un centenar d’oficines de farmacia de la ciudá de Xixón, que participen nesta fase de prueba.
