La Conseyería de Salú va siguir apostando en 2023 pola combinación de nueves tecnoloxíes y sistemes d’información p’ameyorar l’accesibilidá, la calidá y la xestión de la rede sanitaria pública. El conseyeru, Pablo Fernández, compareció na Xunta Xeneral pa informar sobre les llinies maestres del presupuestu pal próximu añu, que va cuntar con 2.126 millones, 159 más qu’esti exerciciu. Con esta dotación, el Principáu volverá alzar la inversión en salú per habitante hasta asitiala en 2.131,93 euros, la más alta del país.

Esti impulsu a la digitalización va traducir en dellos finxos. Asina, el Serviciu de Salú del Principáu (Sespa) va avanzar nel desenvolvimientu de MiAstursalud, un portal d’accesu a la ciudadanía al que se destinen 500.000 euros. Esta ferramienta va facilitar l’accesu a la información necesaria sobro los servicios sanitarios y, especialmente, sobro la hestoria clínica dixital de cada persona. Tamién va dexar realizar trámites. Tou ello, cola máxima seguridá nel tratamientu de los datos y les comunicaciones pa garantizar la confidencialidad.

Otru finxu: dientro d’esta llinia de tresformamientu tecnolóxicu, Salú va rematar en 2023 la implantación del sistema d’información únicu d’atención primaria nos más de 200 centros qu’integren esta rede. La renovación va dexar ameyorar la calidá de la hestoria clínica dixital y la interoperabilidad ente sistemes: la información sanitaria de cada hestoria va ser compartida ente los profesionales de los centros de salú y de los hospitales, lo que garantiza una atención más segura del paciente.

Dientro del mesmu exe de prioridaes, va siguir cola inversión en sistemes d’información, con casi 4 millones pal caltenimientu y renovación d’equipos. Amás, va dedicase otru millón pal sistema integral de los llaboratorios.

Xuntu con estes midíes, van invertise 4,8 millones na compra d’equipamientu p’atención primaria, lo que va amontar la capacidá de resolvimientu d’esta rede.

83,5 millones pa salú mental

Otru de los grandes oxetivos de la conseyería ye’l refuerzu de les polítiques de salú mental, que van cuntar con 83,5 millones. Con cargu a estos recursos va poner en marcha un programa piloto pa promover el bienestar emocional ente la población infanto-xuvenil nel que les families van tener una función fundamental. Esti programa, de calter interdisciplinar y multisectorial, va implicar la intervención de profesionales del ámbitu sanitariu, educativu y municipal. La iniciativa va empezar a aplicase en dos centros d’atención primaria: el de Villalegre-La Lluz, n’Avilés (área sanitaria III) y el de La Calzada II, en Xixón (área V). En dambos casos, va collaborar colos centros educativos públicos de les sos árees d’influencia.

Amás, la Dirección Xeneral de Salú Pública y la Fundación Siloé van desenvolver el proyectu Prometeo pa la rehabilitación psicosocial de persones con trestornos mentales graves al traviés d’un soporte estructural de viviendes y con una intervención basada en autocuidados, psicoeducación, regulación emocional, sofitu terapéuticu ya interacción social.

Meyora de les condiciones llaborales

El conseyeru sorrayó l’esfuerzu del Sespa pa consolidar, estabilizar y fidelizar la plantiya. Esti enfotu vese reflexáu nes cuentes: les polítiques de personal suman 977,5 millones, el 47,96% del presupuestu total del organismu.

Amás, en 2023 va modificase la plantiya orgánica cola creación de 2.165 places estructurales que van dexar estabilizar al personal eventual que se contrata añalmente. Coles mesmes, antes del 31 d’avientu, va publicase la convocatoria de la ufierta pública d’empléu estraordinariu pa la estabilización de 4.793 places del Serviciu de Salú.

Les polítiques de personal tamién van ameyorar la cobertoria de la carrera y el desenvolvimientu profesional. Otramiente, el Sespa va encetar la equiparación de la plantiya del Serviciu d’Atención Siguida (SAC) por aciu la transición escontra un nuevu modelu de Serviciu d’Urxencia d’Atención Primaria. Coles mesmes, van crease nueves places en determinaes categoríes, como enfermeros y enfermeres especialistes o técnicos y técniques de farmacia y de documentación ya informática.