La Conseyería de Salú y el Serviciu de Salú del Principáu (Sespa) van empecipiar la próxima selmana la implantación de la hestórica clínica única p’atención primaria na área sanitaria del valle del Nalón (VIII). El proyectu consiste en centralizar nuna sola base de datos toles hestories clíniques electróniques d’esta rede asistencial.

El centru de salú de La Felguera y los consultorios de Lada y Tiuya van migrar el vienres, día 11 de marzu, del actual sistema a la nueva ferramienta informática, denominada estación clínica p’atención primaria (ECAP), qu’a finales d’abril va tar enllantada en tolos centros de primaria del área VIII, con cabecera en Llangréu. El 11 de marzu nun va haber axenda programada nestos equipamientos sanitarios, polo que namás s’atenderán les urxencies.

La ECAP yá ta enllantada nos centros de salú de les árees II, III y V, con cabecera en Cangas, Avilés y Xixón, respectivamente. Esta postrera lideró l’añu pasáu la puesta en marcha d’esti proyectu, que se va estender a partir de mayu a la área IV, correspondiente a Uviéu. El Principáu invirtió 1.996.500 euros nesti sistema, cofinanciáu con fondos europeos Feder, qu’en dos años va tar operativu en tola rede sanitaria.