El Serviciu de Salú del Principáu (Sespa) adquirió 399.000 dosis de vacunes pa la campaña estacional del gripe y otros virus respiratorios col fin de protexer a la población. La inversión global nestos fármacos, de cinco tipos distintos, xube a 4,7 millones pa que cada persona reciba’l más afayadizu a les sos necesidaes de salú.
P’asegurar el suministru, el Sespa empecipió n’abril los preparativos pa esta temporada que, al igual que l’añu pasáu, va incluyir trés campañes de vacunación nun mesmu periodu: la del virus respiratoriu sincitial, causante d’infecciones respiratories rellacionaes cola bronquiolitis y neumoníes en menores d’un añu; la del gripe estacional, y la de la covid.
La planificación respuende a les pautes establecíes col Ministeriu de Sanidá y el restu de les comunidaes pa determinar la población diana pa la que ta indicada la inmunización. Non toles vacunes pueden ser alministraes a cualquier edá nin toes tienen les mesmes característiques.
La campaña frente al gripe y la covid diríxese específicamente a dos grupos:
Persones con mayor riesgu de sufrir complicaciones o cuadros graves. Encamiéntase a menores de 5 años o más; a persones de 60 años y más, a aquelles que viven en centros de discapacidá y residencies de mayores y a otres institucionalizaes de manera enllargada.
Profesionales que trabayen en servicios esenciales p’amenorgar l’impactu del virus y caltener l’actividá: plantiyes de centros y establecimientos sanitarios y sociosanitarios, persones que trabayen nes fuerces y cuerpos de seguridá del Estáu y les fuerces armaes, bomberos y servicios de Protección Civil.
La vacuna tamién ta indicada pa la población menor de 60 años con factores de riesgu como diabetes, obesidá mórbida, enfermedaes cróniques cardiovasculares, neurolóxiques, renales, respiratories o neuromusculares; pacientes con cáncer o inmunosuprimíos y con trestornos na función cognitiva o con patoloxíes cróniques de cualquier edá; muyeres embarazaes, y quien conviven con pacientes con un altu grau de inmunosupresión.
Amás, encamiéntase pa la población infantil de 6 a 59 meses, personal de guarderíes y centros d’educación infantil; persones de 5 a 18 años que reciben tratamientu enllargáu con ácidu acetilsalicílico; fumadores, celiacos, estudiantes en práctiques en centros sanitarios y sociosanitarios o persones con fístula de líquidu cefalorraquídeu ya implante coclear o n’espera del mesmu.
Al respective de la población infantil, les autoridaes sanitaries aconseyen la vacunación yá que xenera anticuerpos qu’ayuden a combatir el virus, de la qu’amenorga la probabilidá de carecer gravemente y de provocar complicaciones como la neumonía, la bronquitis, la sinusitis o les infecciones del oyíu. La inmunización tamién contribúi a amenorgar la tresmisión del virus y ayuda a protexer a quien ta en contactu con menores, especialmente a aquelles con sistemes inmunolóxicos más debilitaos.
