Xixón al día

Categoría: Tema del día

  • La esencia de Jaen llega a Xixón

    La esencia de Jaen llega a Xixón

    La provincia de Jaén va treslladar esti fin de selmana hasta Xixón los aceites d’oliva virxe extra tempranos d’esta collecha. Failo cola celebración nos Xardinos de la Reina de la VI Fiesta Añal del Primer Aceite. Nesta acción promocional, que va incluyir degustaciones, cates y demostraciones culinaries con esti productu, “van acompañanos más de trenta aceiteros y un grupu importante d’hosteleros de la provincia».

    La Fiesta Añal del Primer Aceite de Jaén llega a Xixón tres la realización la pasada fin de selmana d’esti eventu en Martos. «Foi un terrible ésitu, y con esa ilusión d’amosar esi productu magníficu que ye l’aceite d’oliva virxe extra de primera estracción». Hasta Xixón van treslladase más de trenta primeros aceites d’oliva virxe extra jiennenses d’esta collecha, que van poder ser tastiaos y adquiríos pol públicu. Los asistentes tamién van poder conocer productos de cosmética ellaboraos con aceite. En total, van ser 36 les empreses venceyaes al sector les que van participar nesti eventu que va entamar una ventena d’actividaes.

    Asina, tanto’l vienres, como’l sábadu y el domingu ufiertaránse almuerzos con tostaes y aceites d’oliva virxe extra tempranos de la provincia. Tamién, mientres estos trés díes, van realizase talleres d’artesanía y, a meudía, van llevase a cabo demostraciones culinaries nes que se van ellaborar tapes que van tener l’aceite como principal ingrediente. Coles mesmes, el vienres y el sábadu pela tarde, van poder tastiase productos ellaboraos con aceite d’oliva virxe extra como perlles d’aceite, mermelada y gin tonics. Amás, tanto’l vienres como’l sábadu, van ufiertase espectáculos de flamencu que van correr al cargu de la cantaora Mari Ánxeles Toledanu y del guitarrista Benitu Bernal.

  • El mal tiempu obliga a cerrar el parque d’Isabel la Católica

    El mal tiempu obliga a cerrar el parque d’Isabel la Católica

    El Conceyu de Xixón cerró a primer hora d’esta mañana’l parque d’Isabel la Católica, como midida de prevención énte la envernada de vientu y agua. Según les previsiones meteorolóxiques, el temporal va enllargase mientres tola fin de selmana. Por esti motivu, decidióse tamién caltener el zarru de los campos de golf municipales d’El Tragamón y La Llorea, que s’atopen nun estáu absolutamente impracticable, tres les agües cayíes nos últimos díes.

    Policía Local, Bomberos, EMULSA y Obres Públiques tan preparaos pa faer frente a cualquier emerxencia derivada de les condiciones climatolóxiques mientres la fin de selmana. La coordinación va estendese dende esos servicios a los del Gobiernu del Principáu y el 112, y a la Policía Nacional y la Guardia Civil, al traviés de la Delegación del Gobiernu.

    La Policía Local aprovechó pa realizar un llamamientu a la responsabilidá de la ciudadanía por qu’atiendan los requerimientos de los axentes. Coles mesmes, recuerden los teléfonos gratuitos d’emerxencia a los que llamar, el 092 y el 080.

  • Gonzalo G. Barreñada, premiu Xuan María Acebal de poesía n’asturianu

    Gonzalo G. Barreñada, premiu Xuan María Acebal de poesía n’asturianu

    La ventésima quinta edición del Premiu Xuan María Acebal de poesía n’asturianu recayó nel escritor Gonzalo González Barreñada. El premiu, que concede la Conseyería de Cultura, Política Llingüística y Turismu, tien una dotación de 5.000 euros. D’otra manera, el Premiu María Josefa Canellada de lliteratura infantil y xuvenil en llingua asturiana foi declaráu ermu na so decimosegunda edición, al considerar el xuráu “que nenguna de les obres presentaes axunta nel so conxuntu la calidá lliteraria y llingüística necesaria pa llograr el galardón”, según consta nel acta.

    Polo que se refier al Premiu Xuan María Acebal, el xuráu encargáu de valorar les nueve obres finalistes tuvo presidíu pol director xeneral de Política Llingüística, Antón García Fernández, y integráronlu los escritores Pablo Texón Castañón, Marta Mori de Arriba y Laura Marcos Domínguez. A esti gallardón podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempre que fueren inéditos y non premiaos n’otros concursos.

    Ente les obres presentaes, el xuráu decidió conceder el premiu al poemariu tituláu El llar n’orde destacando “la singularidá de la voz poética que recrea con emoción el paisax natural y humanu n’Asturies con una llingua qu’esplora les posibilidaes del versu llargo averándose a la prosa”. La obra presentóse col seudónimu M.R Beyle. Abierta la plica, l’autor ganador resultó ser  Gonzalo González Barreñada.

    Gonzalo González Barreñada (Sotrondio, 1973), llicenciáu en Xeografía y Historia, ye poeta y narrador en llingua asturiana que se recueye na revista Campo de los Patos y nes obres titulaes: Biografíes, La casa de Xuan Buelga, Hestories de Burgundu y El pesu de la lluz, publicada esti añu.

  • Les lluces de Navidá de Xixón van costar más en 2019

    Les lluces de Navidá de Xixón van costar más en 2019

    La Xunta de Gobiernu del Conceyu de Xixón aprobó una medra de 85.827,31 € IVA incluyíu al contratu soscritu cola empresa Germán Vizcaíno SL pal diseñu, suministru ya instalación del allumáu navidiegu de los años 2018 y 2019.

    Esta medra tien llugar pola intención del consistoriu de llegar a un númberu mayor de barrios y cais pa dinamizar estes zones, recoyendo un mayor númberu d’elementos decorativos a asitiar nes cais ensin contemplar enantes, p’asina potenciar l’actividá turística y comercial de los barrios más alloñaos de la zona centru.

    Germán Vizcaíno ganó l’axudicación d’esti contratu’l 4 d’avientu de 2108, por un importe de 962.536,61 € (IVA incluyíu) pa los dos años de vixencia, con posibilidá de dos prórrogues per un añu caúna d’elles

  • Vox plantega rebautizar L’Humedal como plaza d’España

    Vox plantega rebautizar L’Humedal como plaza d’España

    Vox va plantegar esti miércoles nel Plenu municipal el cambéu de denominación de la plaza de L’Humedal. La formación d’ultraderecha quier llograr el sofitu de la Casa Conceyu pa qu’esti céntricu espaciu pase a nomase plaza d’España. «La llei de Memoria Histórica solo sirvió para xenerar crispadura y estremar ente ciudadanos de primera y segunda. Los Conceyos nun tienen por función reescribir la hestoria», señalen. La formación que llidera Eladio de la Concha quier rebautizar L’Humedal como plaza d’España «lo más llueu posible» pa «zarrar firíes».

    Amás, los de Santiago Abascal van solicitar la instalación d’un mástil nesti mesmu espaciu pa que «la bandera d’España ondee na nuesa ciudá». La formación argumenta qu’esti símbolu, «que representa y xune a toos el españoles», va valir pa escaecer erros del pasáu. Xixón sigue d’esta manera los pasos d’Uviéu, onde’l Pleno yá aprobó la instalación d’una bandera d’España na ciudá. La previsión de la Casa Conceyu ye que la enseña nacional ondee na capital asturiana enantes d’acabar l’añu.

  • La esbarda recoyida en Proaza en mayu, lliberada nos Picos

    La esbarda recoyida en Proaza en mayu, lliberada nos Picos

    La cría d’osu cantábricu recoyida en mayu en Proaza foi reintroducida esti miércoles na vertiente asturiana de la zona occidental del Parque de Picos. Remata asina un trabayu coordináu del personal del parque nel que participaron les trés comunidaes autónomes que coxestionen l’espaciu protexíu.

    La zona onde foi lliberada Saba escoyóse teniendo en cuenta dellos factores como la disponibilidá d’alimentu y la presencia humana escasa. El so treslláu al nucleu oriental del cordal podría contribuyir a conectar la población osera d’esta área, non mui numberosa, cola del occidente, muncho más estabilizada.

    La Guardería de Mediu Natural del Principáu recoyó la cría a finales de mayu na redoma de la corralada osera de Proaza. Carecía desnutrición, deshidratación y alteraciones neurolóxiques y foi unviada a un centru veterinariu pa estabilizala. Tres el so ameyoramientu llixeru, treslladóse al Centru de Recuperación de la Fauna Montesa, en Cantabria. Mientres los trés meses que permaneció ellí algamó un desenvolvimientu óptimu, hasta llegar a los 23 quilos de pesu. Nesi momentu, en setiembre, treslladóse a la cortil de Valsemana, en Llión. Ellí permaneció mes y mediu d’adaptación pa la so reintroducción nel mediu natural.

  • Adiós a Margarita Salas, una de les mayores científiques del sieglu XX

    Adiós a Margarita Salas, una de les mayores científiques del sieglu XX

    La bioquímica asturiana Margarita Salas finó esti xueves en Madrid a los 80 años. Natural de Caneiru (Valdés), foi una de les mayores científiques españoles del sieglu XX. Investigadora del CSIC nel Centru de Bioloxía Molecular Severu Ochoa, en Madrid, Salas siguía trabayando nel so llaboratoriu. «Nun concibo la vida ensin investigación”, señaló Sales al recoyer el pasáu xunu en Viena’l Premiu Inventor Européu concedíu pola Oficina Europea de Patentes y Marques. Ente los llogros de la so carrera, Salas cuenta col descubrimientu del ADN polimerasa del virus bacteriófago phi29, que tien una aplicación crucial en biotecnoloxía: dexa amplificar l’ADN de manera senciella, rápida y fiable. Por ello úsase en medicina forense, oncoloxía y arqueoloxía, ente otres árees. Esta tecnoloxía foi amás una de les patentes más rentables del CSIC.

    “Esta polimerasa usar en tol mundu y aplícase n’analís xenéticu, forense y paleontolóxicu, ente otros”, numberó Salas, en recoyendo’l premiu. “Cuando ún tien cantidaes pequenes d’ADN, como un pelo topáu nun crime o unos restos arqueolóxicos, esti ADN polimerasa amplifica millones de vegaes l’ADN pa poder ser analizáu, secuenciáu y estudiáu”, añedió.

    La patente del métodu del ADN polimerasa phi29 sigue siendo la más rentable que presentó’l CSIC: ente 2003 y 2009 representó más de la metá de los derechos d’autor del organismu, devolviendo millones d’euros n’inversión a la investigación financiada con fondos públicos, según datos de la Vicepresidencia Axunta de Tresferencia de la Conocencia (VATC) del CSIC.

  • Cayida de cascotes xunto a la plaza Mayor

    Cayida de cascotes xunto a la plaza Mayor

    El temporal qu’afecta a Asturies nos caberos díes sigue dexando tres de sí daños en distintos puntos de la ciudá. Efectivos de bomberos intervinieron esti meudía na fachada llateral del edificiu del Antiguu Hotel Madrid pola cayida de cascotes. La intervención foi en redol a les 10.30 hores d’esta mañana.

  • El temporal dexa árboles cayíos, cais cortaes y estrozos nel moblame urbanu

    El temporal dexa árboles cayíos, cais cortaes y estrozos nel moblame urbanu

    La cayida d’árboles y cañes pol temporal obligó a cerrar los dos campos de golf municipales y el parque Isabel La Católica. Tantu’l campu de golf de La Llorea como’l del Tragamón tuvieron que ser zarraos al públicu esti domingu para garantizar la seguridá tres el pasu de la envernada. El primeru foi’l más afectáu pol vientu; dos grandes árboles cayeron próximos a dos greenes, seis cayeron sobro dellos caminos de serviciu y otros seis quedaron descalzos, amás, hai múltiples cañes que se deben retirar.

    Per otru llau, tamién el Parque d’Isabel La Católica permanez zarráu debíu al pasu d’Amelie. El Xardín Botánicu Atlánticu sí ta abiertu sacante la zona de La Isla. L’alcaldesa de Xixón, Ana González Rodríguez, percorrió distintes zones de perxudicaes y recuerda que l’alerta sigue activada pidiendo a los ciudadanos que respeten les alvertencies de la Policía Local y servicios d’emerxencies.

    Un árbol de grandes dimensiones cortó Carlos Marx estrozando trés vehículos que permanecíen aparcaos

    La tormenta Amelié causó numberosos daños materiales en Xixón. La primer llamada a la Policía Local rellacionada con ella recibióse a les 20:39 hores del sábadu. A partir d’esi momentu y hasta les 7 de la mañana, les llamaes fueron constantes. Rexistráronse daños en más de venti víes. N’avenida de Carlos Marx, un árbol de grandes dimensiones cortó la cai estrozando trés vehículos que permanecíen aparcaos. Otru árbol esbarrumbóse nel camín del Cañaveral cortando’l pasu y provocando daños nel bistechu y teyáu de la casa colindante. Una de les cañes entró nuna de les habitaciones.

    Per otru llau, alredor de les 02:10 hores, na plaza del 3 d’abril d’El Llano, el cuerpu de bomberos viose obligáu a asegurar la carpa onde se taba celebrando Samaín. El públicu taba abellugándose baxo la mesma y corría peligru de llevantamientu. Tamién tuvieron qu’asegurar una chapa de la fachada d’El Molinón, al altor de la puerta nº 12, que tuvo a puntu de venise embaxo.

    Munches de les intervenciones viéronse atayaes mientres la nueche poles mesmes condiciones metereológicas ante la necesidá d’utilizar un vehículu autoescalera pa solucionales. A lo llargo del día va trabayar pa solucionales col refuerzu de les dotaciones del serviciu de prevención, estinción de quemes y salvamentos de Xixón. Amás, los operarios de EMULSA tán collaborando por tola ciudá nos llabores de llimpieza retirando cañes, tueros, cascotes, etc.

  • Xuntanza vegana en Xixón

    Xuntanza vegana en Xixón

    El Centru Cultura Vieyu Institutu acueye esti sábadu l’alcuentru Xuntanza Vegana. Esti conceyu, abiertu a cualisquier persona que quiera saber más sobre veganismu, tien l’envís d’averar d’una forma respetuosa y divulgativa información sobre’l conceptu veganismu y tolo que lo arrodia. El programa inclúi cuatro conferencies dende la nutrición hasta la ética animal, pasando pol deporte. «Podemos vivir ensin facer sufrir a otros animales non-humanos», espliquen nun nota.

    La entrada ye de baldre. Amás de les conferencies va haber talleres y cuentacuentos pa la reciella pa que deprendan que ye posible pasalo prestoso siendo respetuoses con tolos animales. A lo llargo’l día va haber una amuesa de semeyes d’Irene Ziel sobre’l so trabayu fotoperiodisticu All Beings sobre granxes y la realidá d’estos espacios d’esplotación animal.

    Les conferencies tán dividies en dos partes. Pela mañana abrirá la xornada Shafika Perea, nutricionista col títulu Claves pa una dieta vegana, 100% vexetal, saludable. La segunda conferencia de la mañana vendrá de la mano de Marta I. González baxo’l títulu Xuegu llimpiu: deporte y los otros animales. Pela tarde, Olaia Freiría falará de L’antiespecismu y la defensa de los animales nel mundu xabaz. P’acabar llegará’l momentu del Frente L.A. Santuario Animal cola so conferencia Una segunda oportunidá pa vivir llibre y feliz. Tamién va haber degustaciones y música en vivu.