Les lluces de Navidá yá tán escolingaes en delles cais de Xixón, mui enantes del entamu oficial de les fiestes. En zones como la cai General Suárez Valdés, yá se pueden ver los primeros adornos lluminosos qu’anuncien la llegada de la Navidá. L’Ayuntamientu prevé que nos próximos díes se complete la instalación pel restu de barrios.
Categoría: Tema del día
-
El Gobiernu d’Asturies llanza per primer vegada ayudes a viviendes interxeneracionales y collaboratives
El Gobiernu d’Asturies llanza per primer vegada ayudes pal fomentu de viviendes collaboratives y interxeneracionales, con una dotación de 1,3 millones. Esta llinia de sovenciones, inédita na comunidá, va sofitar proyectos qu’amás seyan accesibles, enerxéticamente eficientes y que tengan un compromisu de xestión social o cooperativa.
La Conseyería d’Ordenación de Territoriu, Urbanismu, Vivienda y Derechos Ciudadanos va publicar mañana nel Boletín Oficial del Principáu (Bopa) esta convocatoria, destinada a impulsar modelos como’l cohousing, los agospios temporales y otres modalidaes similares.
La cuantía máxima de l’ayuda va ser de 420 euros per metro cuadráu de superficie útil. Amás, el total de la sovención nun va poder superar el cincuenta per cientu de la inversión nel proyectu, con una llende máxima de 50.000 euros pa cada agospiamientu o vivienda.
Les ayudes van tramitar en réxime de concurrencia competitiva y van concedese en función de los criterios de valoración recoyíos na convocatoria.
-
Podemos reclama l’acondicionamientu de la parte pendiente de los terrenos d’El Solarón
La vocera de Podemos nel Conceyu de Xixón, Olaya Suárez, va llevar al Plenu municipal del miércoles 8 una entruga sobre l’adecuación de los terrenes d’El Solarón y la evolución del desenvolvimientu del Plan de Víes.
La conceyala recordó que la parte del suelu del antiguu trazáu ferroviariu allugáu ente’l Muséu del Ferrocarril y la estación de Sanz Crespo lleva “más d’una década clausurada y n’estáu d’abandonu, inhabilitada pa la ciudadanía”, llamentando que magar de la reivindicación vecinal y les promeses ufiertaes dende’l Conceyu, los y les xixoneses “nun pueden esfrutar, nin siquier transitar estos terrenes públicos, que siguen siendo una ferida na trama urbana en plenu centru de la ciudá”.
Poro, teniendo en cuenta que la reconfiguración definitiva d’esti espaciu entá va tardar años en llegar, Suárez quier conocer si nel marcu de les actuaciones previstes na primer fase del Plan de Víes, anunciaes tres la última xunta del conseyu de Xixón al Norte’l pasáu marzu -la baltadera del viaductu de Carlos Marx y la reordenación urbana nesa redolada-,
contémplase esa adecuación pindia p’abrir los terrenes a la ciudadanía.De la mesma, la iniciativa presentada por Podemos recuerda que ta pendiente la firma d’una adenda al conveniu del Plan de Víes de 2019 pa dar soporte xurídicu y financieru a les actuaciones anunciaes anguaño, polo que se pregunta sobre l’estáu d’esti trámite.
-
ADAE reclama una organización xusta y n’igualdá pal enseñu del asturianu nes EOI
L’Asociación de Docentes d’Asturianu y Eonaviegu/Gallego-asturiano (ADAE) destaca la incorporación per primer vegada del asturianu a la Escuela Oficial d’Idiomes d’Uviéu (EOI) como un pasu históricu y fundamental pa la normalización y dignificación de la llingua asturiana.
Dende va meses, vienen la creación d’una bolsa específica d’interinidá pal cuerpu de profesoráu d’EOI que permita cubrir les places con profesoráu de llingua asturiana interín, como asocede col restu d’idiomes ufiertaos nes escueles d’idiomes. Por embargu, denuncie que «la Conseyería d’Educación optó por cubrir les places docentes mediante comisiones de serviciu pa profesoráu funcionariu de carrera d’otres especialidaes. Esta decisión xenera retrasos, inestabilidá y desigualdaes col restu d’idiomes. Mentanto’l profesoráu de la EOI lleva dende’l 1 de setiembre trabayando na organización d’esti cursu escolar, la persona encargada de la docencia de llingua asturiana va incorporase a mediaos d’ochobre, ensin materiales nin tiempu p’afayase al centru. Amás, l’alumnáu va empezar el cursu dempués que’l restu d’idiomes».
Dende ADAE tamién denuncien que dalgunes titulaciones que se valoren como méritos pa la creación de la bolsa, amás de ser requisitu d’accesu, «nun se pueden cursar dende va 15 años, lo que supón una discriminación pa les nueves xeneraciones de docentes. Per otra parte, llama l’atención que nun se valore como méritu la superación de les pruebes de certificación de C1 o B2 de llingua asturiana, al mesmu tiempu que se valoren les certificaciones de la EOI d’idiomas estranxeros».
«Esta situación nun ye un fechu aislláu: ye otru exemplu más de la falta d’especialidá docente n’asturianu, una carencia que se repite en distintos ámbitos del sistema educativu y que xenera inestabilidá, desigualdaes y dificulta la planificación a llargu plazu», añeden.
Dende ADAE celebren que l’asturianu llegue a la EOI, pero llamenten fondamente que lo faiga en condiciones tan precaries. Por ello, reclamen a la Conseyería d’Educación que corrixa estes deficiencies y abra una bolsa de profesoráu interín que garantice la cobertura de baxes y el derechu a la enseñanza de tol alumnáu.
-
El Principáu empecipia mañana la segunda fase del programa de bonos de descuentu pal pequeñu comerciu
El Gobiernu d’Asturies entama mañana la segunda fase del programa de bonos de descuentu pal pequeñu comerciu Bono Comerciu Asturies, al que destina 1.285.190 euros.
Les persones interesaes van poder descargar los bonos, a partir de mañana y hasta el 15 d’ochobre –si nun s’escosen enantes- por aciu la so inscripción nel portal: https://bonoscomercioasturias.com. El plazu pa trocalos tamién empieza mañana y va rematar el 30 de payares.
Al tratase de la segunda fase del programa, los 1.200 comercios xuníos son los mesmos que participaron nos meses de mayu y xunu.
Pa les persones interesaes en consiguir los bonos, el programa va funcionar de la mesma que na primer fase. El sistema de descuentos articúlase al traviés de la plataforma web, na que los usuarios, una vegada rexistraos, van poder descargase los bonos. Estos van tener formatu dixital, van cuntar con un códigu QR y van poder utilizase por aciu una aplicación que dexa pagos dixitales.
Cada persona va poder descargase, a lo más, 5 bonos de 10 euros, y va poder utilizar unu por cada 30 euros de compra. El Gobiernu d’Asturies va poner en circulación un total de 125.819 cupones, que son los que nun se consumieron nos meses de mayu y xunu.
Al respective de la participación, aquellos usuarios que se fixeron colos bonos en primavera, namás van poder disponer de los que nun trocaren nes sos compres, pa lo que tendrán de volver a solicitalos. Si yá consumieron toos, nun van poder participar nesta segunda fase. D’esta forma, quien gastara dos cupones mientres la primer fase va disponer agora d’otros trés, ente que quien nun trocara nengún va poder emplegar los cinco nuevos bonos.
La directora xeneral d’Empresa y Comerciu, Arantxa González Montell, confía en que la estensión del programa Bono Comercio Asturies tenga’l mesmu ésitu que la primer convocatoria y contribuya, una vegada más, a impulsar les ventes nos pequeños establecimientos.
La iniciativa, promovida pola Conseyería de Ciencia, Industria y Empléu, sofita les ventes del comerciu minorista en periodos de baxa demanda y contribúi a estimular la economía. Na so primer fase, trocáronse 171.481 bonos por importe de 1,71 millones, que se traduxeron nun volume de ventes de 6,81 millones nesti tipu d’establecimientos.
-
Ramón Tuero acusa al gobiernu de debilitar el Plan de Normalización Llingüística
El conceyal Ramón Tuero acusó güei al gobiernu de debilitar el Plan de Normalización Llingüística al interponer el recursu d’apelación frente a la sentencia del Tribunal Cimeru de Xusticia que l’anulaba. Tal como esplicó’l conceyal del Grupu Municipal Socialista esta mañana, yá alvirtiera que s’anularen toles ordenances y planes de normalización llingüística impugnaos. “El Gobiernu municipal llevó’l recursu d’apelación del Plan de Normalización Llingüística del Conceyu de Xixón al Plenu del 14 de mayu de 2025, y nós fuimos l’únicu grupu municipal que nos abstuvimos. ¿Por qué? Alvertir: la TCXA anuló toles ordenances y planes de normalización del asturianu que fueren impugnaos dende 2016 por requisitos llegales”, señaló.
El PSOE critica que, agora, lo que consiguieron ye atribuyi-yos a les sos 91 midíes una naturaleza orientativa. “Lo que’l gobiernu municipal fixo al recurrir la sentencia ye debilitar el plan, dándo-y fuerza orientadora y non de norma xurídica”, llamentó Tuero.
El conceyal yá pidió nel citáu Plenu que tramitara un nuevu Plan que cumpliera con tolos requisitos llegales que faltaben, ente otros asuntos, l’informe económicu, la memoria, consulta pública… “Y siguimos diciendo -apunta’l conceyal- qu’esa ye la única solución énte la nulidá de la norma aprobada pol consistoriu: tramitar un nuevu plan correctamente, como esixe la llei”,
Dende’l PSOE xixonés esperen, por tanto, que nun cometan otra vegada’l mesmu erru de volver presentar un recursu porque yá fueron condergaos a pagar los costos del xuiciu por perder l’anterior; “perdiéronse munchos meses y amás en nada ayudaron, a la promoción y usu del asturianu nel conceyu”, conclúi.
-
Barbón apuesta por defender la estensión de la gratuidá de la matrícula universitaria a tolos cursos a partir del próximu añu
El presidente asturianu, Adrián Barbón, anunció la so intención d’estender la gratuidá de la matrícula universitaria a tolos cursos y en tolos graos de la Universidá d’Uviéu, siempres que s’algame un rendimientu académicu determináu en primer cursu. Esta midida va incluyise na negociación de los presupuestos de 2026, asinia que podría aplicase yá en septiembre d’esi añu, al entamu del próximu añu académicu.
Na segunda xornada del alderique d’orientación política xeneral, el xefe del Executivu apostó por configurar un “auténticu sistema educativu públicu y gratuitu dende Les escuelines hasta rematar la formación universitaria”. Esti foi unu de los catorce nuevos compromisos asumíos por Barbón, tres los 52 qu’enunció na xornada d’apertura del alderique parlamentariu.
Otru de los principales anuncios ta venceyáu a la vía fiscal asturiana, una ferramienta cola que’l Gobiernu d’Asturies espera algamar un aforru de 70 millones pa les clases medies y trabayadores nes declaraciones de la renta correspondientes a 2024. P’afondar nesta llinia, van aumentase les deducciones nel IRPF por fíu a cargu, que se van asitiar en 600 euros pol primer descendiente –na actualidá son 500- y en 2.200 pol segundu, frente a los 2.100 vixentes. La llende de renta p’aportar a estes ventayes afítase en 35.000 euros, en declaración individual, y en 45.000 en declaración conxunta.
En relación col turismu, Barbón informó de que’l gobiernu va afaer la finca de Les Llanes, en Cuadonga, pa crear un aparcamientu disuasoriu cercanu a la basílica y una vía d’accesu piatonal.
Igualmente, destacó qu’a partir del próximu cursu va aplicase la xornada de 23 hores selmanales pal cuerpu de maestros y que se va crear una unidá d’ictus nel Hospital San Agustín, colo que toles árees sanitaries van disponer yá d’esti serviciu. Dambes iniciatives empobínense al refuerzu del estáu del bienestar, a diferencia d’otres comunidaes “nes que va retrocediendo día ente día”, según llamentó’l presidente.
-
La marca ‘Alimentos del Paraísu Natural’ va promocionar na 39º edición d’Agropec con un mercáu y un espaciu gastronómicu
La marca de calidá Alimentos del Paraísu Natural va promocionar na 39ª edición de la Feria del Campu y de les Industries Agrícoles, Ganaderes, Forestales y Pesqueres (Agropec), en Xixón, con un mercáu con 22 productores y un espaciu gastronómicu, que se va desenvolver del 26 al 28 de setiembre nel Recintu Ferial d’Asturies Luis Adaro.
La directora xeneral d’Agricultura, Agroindustria y Desenvolvimientu Rural, Begoña López, participó ayeri na presentación d’esti eventu, onde esplicó que la feria va cuntar cola participación de 22 profesionales que mientres la fin de selmana van poner a la venta productos como quesos, arándanos, cogordes, xelaos ellaboraos con lleche, conserves, ternera asturiana, miel, marañueles, embutíos, fabes y productos ecolóxicos.
La feria preséntase como un puntu d’alcuentru ente profesionales, productores, instituciones, families y públicu xeneral, destacando la fusión d’innovación tecnolóxica y los valores de la sostenibilidá y la producción local.
Con una amplia ufierta d’actividaes, esposiciones y esperiencies pa tolos públicos, Agropec 2025 perfílase como una de les feries más relevantes del país. Ente les actividaes más destacaes d’esta edición, los asistentes van poder esfrutar d’una esposición de güertes tanto profesionales como familiares, talleres y actividaes educatives sobre l’apicultura, un espaciu dedicáu a l’alimentación de proximidá con productos asturianos de calidá amparaos baxo la marca Alimentos del Paraísu Natural, y una amplia variedá d’exhibiciones de maquinaria agrícola y ganadera. Amás, la reciella va poder esfrutar d’una zona infantil con actividaes lúdiques y educatives, mientres que los adultos van poder asistir a los concursos y esposiciones de races autóctones d’Asturies.
Amás, la feria va axuntar a exemplares de races autóctones como l’Asturiana de los Valles, Asturiana del Monte, Frisona, Xalda, cabra Bermella, Gochu Asturcelta, Pita Pinta Asturiana y Asturcón, ente otres, convirtiéndose nun escaparate únicu pa la promoción de la xenética y el caltenimientu de les races asturianes.
Los concursos oficiales de ganáu, unu de los momentos más tradicionales d’Agropec, tamién van tar presentes nesta edición, con certames tan destacaos como’l 45º Concursu Nacional de la Raza Frisona Conafe 2025, el 35º Concursu Nacional de la Raza Parda y el VII Concursu Puya Nacional de Poni Asturcón. Estos concursos un solo busquen premiar a los meyores exemplares, sinón tamién resaltar la calidá xenética de los animales y el llabor de los ganaderos asturianos na preservación de les races autóctones.
Agropec 2025 diferénciase pola so capacidá pa combinar la tradición cola innovación, promoviendo práctiques agrícoles respetuoses col mediu ambiente y fomentando la sostenibilidá del mediu rural. La feria conviértese nun puntu d’alcuentru pa los profesionales del sector y una cita d’ociu y formación pa les families y el públicu polo xeneral, que va poder esfrutar d’actividaes úniques y educatives al rodiu del mundu rural.
-
Reconocimientu mundial pal técnicu xixonés Luis Enrique
El técnicu xixonés Luis Enrique foi reconocíu esti llunes col Trophée Johann Cruyff al meyor entrenador de la temporada 2024-2025. El premiu entregóse na gala del Ballon d’Or, entamada por France Football y la UEFA, onde se destacó la trayeCtoria y los llogros del entrenador asturianu.
La celebración tuvo tamién otros nomes propios: el futbolista Dembélé, pupilu de Luis Enrique, recibió un reconocimientu especial, la catalana Aitana Bonmatí que volvió ser protagonista al alzase col Balón d’Oro.
Pa la ciudá de Xixón, esti galardón tien un significáu especial, al poner de nuevu nel focu internacional a un de los sos referentes más conocíos del fútbol modernu.
-
David Uclés afonda na so obra na Residencia Lliteraria Xixón
La Residencia Lliteraria Xixón acueye nestes selmanes a un invitáu mui especial: l’escritor, dibuxante y músicu úbetense David Uclés. L’autor ta desendolcando un nuevu proyectu creativu nel marcu d’esta estancia, que s’estenderá hasta la fin d’ochobre.
El direCtor de la Residencia, Inaciu Galán, señaló que la llegada d’Uclés supón «una oportunidá pa reforzar los venceyos ente Asturies y una de les voces más destacaes de la narrativa actual».
Nacíu n’Úbeda en 1990, Uclés algamó gran ésitu con La península de las casas vacías, novela que superó los 200.000 exemplares vendíos y que lo consagró como referente d’una xeneración. Amás de la so reconocencia lliteraria, la so trayeutoria inclúi premios importantes y un públicu fiel que sigue cada pasu del escritor.
Como parte de la so estancia en Xixón, Uclés participará nesta selmana en dos cites abiertes al públicu: la primera, esti domingu a les 17 hores en La Revoltosa, y la segunda a les 18:30 en Toma3. Nelles, l’autor compartirá reflexones sobre la so obra y l’andamiaxe del so nuevu proyectu, con conteníos sorpresa pa los asistentes.
La so presencia na Residencia Lliteraria conviértese asina nun eventu cultural destacáu pa la ciudá, que reafita’l so papel como espaciu de creación y diálogu coles artes contemporánees.