La primer edición del Premiu d’Asturianada Obdulia Álvarez ‘La Busdonga’, convocáu pol Gobiernu d’Asturies, yá tien finalistes. El xuráu del certame escoyó pal so pase a la final a dos aspirantes por caúna de les modalidaes que toma’l galardón: absoluta femenina, absoluta masculina y moza, dempués de les trés semifinales que se celebraron esti mes en Cangas, La Pola Siero y La Felguera. Los escoyíos son Lorena Corripio López y Alicia Villanueva Megido, en categoría femenina; Sergio Menéndez Fernández y Carlos Velasco Montes, na masculina, y Néstor Díaz González y Marina Carbajosa González, na moza.
La final va celebrase’l vienres, 29 de payares, nuna gala nel Teatru de la Llaboral de Xixón, a les 19:00 hores. Mientres el xuráu delibera, van cantar dos intérpretes consagraos nel cantar asturianu: Mari Luz Cristóbal y Jorge Tuya. La entrada ye gratuita, pero ye preciso retirala enantes nes taquilles habilitaes o al traviés de la web de Llaboral Ciudá de la Cultura.
La Conseyería de Cultura, Política Llingüística y Deporte destina una suma de 15.000 euros a esti galardón, distribuyíos en 6.000 pa la categoría masculina, 6.000 pa la femenina y 3.000 pa la moza. Con esta iniciativa, búscase promover y espublizar el cantar asturianu, una de les manifestaciones culturales más significatives de la comunidá, declarada bien d’interés cultural (BIC) de calter inmaterial en 2015.
Cultura escoyó la figura d’Obdulia Álvarez Díaz, más conocida como La Busdonga, pa dar nome a esti certame de música asturiana coles mires de reivindicar la trayectoria d’una muyer que na primer metá del sieglu XX impúnxose a los estereotipos de la dómina y destacó pol so talentu musical.
