Shego, la banda madrileña formada por Maite Gallardo, Raquel Cerro y Charlotte Augusteijn van presentar No lo volveré a hacer, el so segundu trabayu na “Folixa VESU” que va celebrase el 31 de mayu en Kuivi Almacenes y que va ser la presentación oficial del festival, que va celebrase’l próximu mes de xunu.
Les madrileñes nun van tar soles y ye que van compartir cartel colos asturianos Puño Dragón, protagonistes del “Conciertu Vibra Mahou”. La banda de rock alternativu formada Rafa Tarsicio (ex-Tigra), Germán Mingote (Mingote), Manu Huertas (The Parrots) y Erik Iglesias (Destino 48) con un particular imaxinariu musical, que mama del rock tradicional pero amosando sones propios de la escena d’angüaño. Una mecigaya musical que los llevó a nomase a sí mesmos “vieyos pero modernos”. El cuartetu torna a casa, Uviéu, pa presentar el so segundu álbum, Juegos Violentos. Les entraes pa esti estrenu del festival de música independiente yá tan a la venta a un preciu de 18 €. Y hai más, porque les persones que yá mercaron l’abonu de VESU 2025 (20-22 de xunu) y tamién vayan a la folixa de presentación van tener de baldre l’abonu transporte dende Uviéu pa poder dir a los conciertos que se celebren en Güeñu.
Per otru llau, VESU, el festival de música independiente que sofita la Fundación Municipal de Cultura del Ayuntamientu d’Uviéu y el consistoriu de La Ribera, anuncia que cierra’l so cartelu con la catalana Suu, una de les cares moces más representatives del empoderamientu femenín nos escenarios del estáu. La so propuesta de indie-pop llega a VESU col nuevu trabayu embaxo’l brazu Material sensible.
Suu xúnese asina al cartel d’un festival que va amosar nel mes de xunu n’Uviéu y Güeñu (La Ribera) a León Benavente, Porridge Radio (les britániques van celebrar en VESU’l so últimu conciertu n’España enantes de dexalo como banda), Queralt Lahoz, Los Punsetes, Pablo Senator, los portugueses Ana Lua Caiano y Bateu Matou, Delgado, Sanguijuelas del Guadiana, Neura, Nadie Patín y los franceses La Batt Mobile.
El tercer tramu d’abonos de VESU, que nesta nueva edición va volver cuntar col sofitu de Vibra Mahou, la plataforma de música que puxa poles esperiencies Cinco Estrellas en tornu al directu, puen mercase na web www.vesu.es a un preciu de 50€+(G.G.).
