El pasáu vienres hubo nel Teatru Albéniz de Xixón una cita mui especial con unu de los grupos indie del momentu. Shinova volvía per segunda vegada esti añu a Asturies, y ye que dempués d’enllenar l’Espaciu Estilu’l pasáu 19 d’abril n’Uviéu, nel Albéniz repitieron llenazo coles entraes escoses dende va selmanes. La xira “El Presente” del grupu de Berriz aterrizó nel teatru Albéniz la tarde del vienres de la mano del programa de conciertos Vibra Mahou, la plataforma de música de Mahou Cinco Estrellas, promueve los alcuentros alrodiu del directu.
Antes d’entrar nel espaciu, la cola qu’esperaba dende primer hora de la tarde na cai San Bernardo anunciaba l’aforu completu qu’esperimentó l’ALbéniz poco dempués. La espera tuvo’l so premiu inclusive primero qu’empezara el conciertu, colos integrantes de Shinova dexándose ver nel esterior del teatru, onde dalgún afortunáu pudo llevase dalgún selfie colos músicos.
Una vegada dientro del teatru la espera enllargóse unos minutos onde’l públicu aprovechó pa colocase y escoyer el meyor llugar pa recibir la descarga sonora del grupu vascu. Foi xustamente asina cuando empezaron a sonar los primeros acordes de Shinova, con un rumbu d’enerxía dende los primeres compases del conciertu. Enganchóse’l públicu mui rápido al bon rollu y al optimismu qu’esprendíen los cantares, que taba vibrando colos temazos que fuimos escuchando. Ye chocante l’algame que tien esta banda ente la so audiencia, yá qu’hai tou tipu de rangos d’edá ente los asistentes, lo que fala del poder que tien la música de Shinova de contactar con tou tipu de xeneraciones.
El conciertu tuvo viñáu de nuevos cantares del so últimu discu y clásicos como “La Sonrisa Intacta” y «Te debo una canción”, ensin dulda les favorites del públicu. Asina foi a lo llargo de les dos hores y media que duró l’actuación dexándonos ver un perampliu repertoriu de cantares que cumplieron les espectatives.
