Ayeri, ganóse de llonxe cola apertura de los XI Alcuentros de Músiques Asturianes que fizo Silvia Quesada, acompañada de Alfredo González y Cristina Gestido nel escenariu, na Ciudadela de Celestino Solar, un espaciu bien afayadizu pa conciertos de formatu pequeñu como’l d’ayeri.
La cantante tinetense abrió’l conciertu poco dempués de les 19:30 hores onde repasó los cantares de la so discografía, acompañaos de delles anécdotes que fueron surdiendo al componelos. Hebo tamién tiempu p’alcordase de xente y amigos qu’acompañen y acompañaron a l’artista a lo llargo de la so trayectoria, con cantares como Al borde la to cama o La mesma revolución, un cantar que en pallabres de Quesada «sonó muncho más estos últimos díes poles eleiciones que dende que saliera».
Los alcuentros siguen mientres estos díes con delles actuaciones más:
7 de xunu: Mostru l’Horru y JotadeJota (Ciudadela de Celestino Solar)
8 de xunu: Slum Suit (CCAI)
21 de xunu: Deira Band (Cai Tomás y Valiente)
