El pop d’autora de Silvia Quesada y el folk-pop de Cerezal van ser los encargaos d’abrir la primer edición d’Amosando 2020. La llibrería-café Toma3 de Xixón va acoyer esta grabación a les 17 hores del domingu 28 de xunu. La entrada ye de baldre pero’l so aforu ta llendáu a les persones que ganen una invitación participando nun sortéu al traviés de les redes sociales de la tienda online y distribuidora dixital musicasturiana.com. La distribuidora dixital ye organizadora del eventu xunto col realizador audiovisual Javier Lueje y Goxe Producciones. Amosando tien el patrociniu de la estaya de Turismu del Ayuntamientu de Xixón y de la Fundación Caja Rural de Asturias.
Silvia Quesada, cantante de Tejedor y Los Gatos del Fornu, va presentar ‘Prefiero Ver Llover’. Esta ye la so segunda referencia discográfica en solitariu na que’l so soníu evoluciona hacia una propuesta pop mui cuidada y completa. Pela so parte, Cerezal van tocar los temes de ‘La Cereza’l Cielu’, un discu qu’entemez folk, pop, rock y incluso electrónica, llevando a la música de raíz tradicional a nueves sonoridaes. Los dos trabayos son una renovación dientro de la música fecha n’asturianu y tuvieron premiaos nos AMAS 2020.
Amosando nació en marzu de 2019 como un ciclu de presentaciones de discos con un formatu ente conciertu acústicu con aforu reducíu, programa de televisión y alderique. La iniciativa, pionera n’Asturies, nació col oxetivu de visibilizar a la música asturiana dientro y fuera de les nuestres fronteres. El ciclu cuntó l’añu pasáu cola participación de L-R, Xaime Martínez, Ún de Grao, D’Urria, Anabel Santiago y Eva Tejedor & Les Pandereteres. En 2019 perpasáronse les 100.000 reproducciones nos videos publicados en YouTube y Facebook.
