Llaboral Centru d’Arte y Creación Industrial escoyó’l proyectu Encuentros Transmedia del estudiu d’arte y arquitectura suecu-asturianu Space Popular pa empezar una residencia de 9 meses de duración nel contestu de la rede europea European Digital Deal. Encuentros Transmedia, desenvueltu polos artistes Lara Lesmes (Uviéu) y Fredrik Hellberg (Estocolmo), va esplorar el nuevu panorama social resultante del surdimientu d’espacios híbridos de lo físico y lo dixital.
La propuesta aborda la desigualdá d’accesu de determinaes poblaciones a les nueves tecnoloxíes de la comunicación, que conduz a formes d’aislamientu y esclusión. El dúu defende un enfoque polifacéticu que toma la investigación sobre’l terrén, la ellaboración de polítiques, el desenvolvimientu de nueves interfaces y el diseñu de prototipos pa que’l públicu esperimente al traviés de foros públicos d’aprendizaxe y alderique.
Los artistes van recibir una beca de 25.000 euros pa desenvolver el proyectu cofinanciáu por Europa Creativa—, y van cuntar col sofitu d’un grupu d’espertos formáu por Marta Peirano (escritora y periodista española, especialista na intersección
ente tecnoloxía y poder), Javier Fernández (Director Xeneral d’Estratexa Dixital ya Intelixencia Artificial del Gobiernu d’Asturies), Alejandra López
(filósofa especializada en Tecnoloxíes Dixitales), Ramón Rubio (director
de MediaLab), y Hugo Díaz (Dixital Manager del Gobiernu d’Asturies).
