El candidatu d’IX – Más País – IAS, Javier Suárez Llana, presentó esti domingu les propuestes para aumentar la disponibilidad de vivienda pública para moces na ciudá énte los problemes d’accesu a la vivienda y al alquiler accesible.
Suárez Llana recordó que la tasa d’emancipación xuvenil n’Asturies asitiase nel 14 % y que’l númberu de mozos que vive fora de la vivienda familiar amenorgóse nos últimos años por cuenta de los altos precios del arriendu. “En 2022, una persona nueva destinaba de media’l 60 % del so salariu al pagu del alquiler. Esta realidá torga que les persones nueves na nuesa ciudá desenvuelvan un proyectu de vida. Lo que pretendemos ye poner solución a esti problema”, indicó’l candidatu a l’alcaldía.
Como soluciones, la propuesta d’IX – Más País – IAS inclúi la creación de 350 nueves viviendes con alquileres asequibles, esto ye, con precios inferiores al 30 % de los sos ingresos reales; y que diches viviendes atópense esvalixaes por tola ciudá, incluyida la zona céntrica. Esta midida enmárcase dientro de la propuesta yá anunciada pa la creación
de 1.000 viviendes públiques en cuatro años por aciu un consorciu ente’l Conceyu, el Principáu y l’Alministración Xeneral del Estáu, de les que una tercer parte dedícase a moces.
Con esti oxetivu, Suárez Llana esplicó la intención d’aumentar en 21 viviendes les que’l programa Comparte Mozu destina al alquiler accesible pa mozos. “Esti programa de convivencia xeneracional tien 19 viviendes y queremos que pase hasta les 40 por aciu la compra per parte de la Empresa Municipal de la Vivienda de vivienda vacida na ciudá y esvalixada nos distintos barrios”, indicó’l candidatu.
A lo último, la coalición d’IX – Más País – IAS propón xuna actuación singular cola recuperación del antiguu edificiu de la Caxa d’Aforros y Monte de Piedad, na cai Institutu. L’edificiu, construyíu ente 1940 y 1942 cedióse a la entidá bancaria, cofundada pol Principáu d’Asturies y el Conceyu de Xixón. Anguaño l’edificiu ye propiedá de la Fundación Bancaria Cajastur y nun tien nengún usu, señaló Suárez Llana, polo que se plantega la recuperación d’esti patrimoniu y la creación de 22 nueves viviendes pa moces.
La propuesta inclúi la instalación d’una sala d’estudios na planta baxa del edificiu y
un espaciu de coworking pa microempreses, trabayadores dixitales y autónomos, col
propósitu d’ufiertar actividaes económiques alternatives na zona. Amás, les viviendes van cuntar con trasteros, aparcabicis y servicios comuñales como llavandería, nel semisótanu; y plaques solares pa facer l’edificiu energéticamente sostenible.
Finalmente, el candidatu a l’alcaldía propón que la residencia d’estudiantes del campus universitariu de Xixón instalar nel Colexu Menor de la Universidá Llaboral, en llugar de recurrir a la construcción de nuevos edificios. “Creemos que la residencia d’estudiantes
nun tien que ser un nuevu proyectu, sinón que tien que se rehabilitar esi espaciu de la Universidá Llaboral p’allugala ende. Ye muncho más sostenible dende’l puntu de vista del mediu ambiente y del urbanismu aprovechar les infraestructures que tenemos en desusu”, amestó Suárez Llana.
