El candidatu d’IX – Más País – IAS a l’alcaldía, Javier Suárez Llana, plantega una serie de midíes pal barriu de L’Arena tres la xunta sostenida esti llunes con representantes de l’asociación vecinal. L’Arena ye unu de los barrios de Xixón más afectaos pola proliferación de les viviendes d’usu turísticu. De les 1.222 viviendes vacacionales con llicencia rexistraes
na ciudá, 203 tán en L’Arena. Nesti sen, Suárez Llana propón una ordenanza municipal que llinde’l númberu de viviendes turístiques por barriu y por bloque, amás d’un refuerzu de los servicios d’inspección urbanística nesta materia.
Pa midir l’impactu de les viviendes turístiques nos precios del alquiler de los barrios, el candidatu d’IX- Más País – IAS plantega tamién la creación d’un observatoriu municipal pa monitorizar la evolución de los precios y establecer llendes por aciu la reconocencia de les zones tensionadas, una competencia de los conceyos reconocida pola nuevu llei de vivienda.
El barriu de L’Arena cuenta tamién con munches viviendes vacíes inutilizaes pol estáu nel que s’atopen, que xeneren problemes nos edificios y que contribúin a tener barrios deshabitaos. “Na ciudá tenemos un problema d’accesu a la vivienda, con poca disponibilidá de viviendes y arriendos abusivos», señaló Suárez Llana.
Pa impulsar la rehabilitación de viviendes vacíes en mala traza y el so usu p’alquiler a precios afayadizos, la coalición d’IX – Más País – IAS propón una nueva llínea nel
programa Xixón Alquila. En cuenta de la cesión de la vivienda mientres un tiempu determináu, la Empresa Municipal de la Vivienda (Emvisa) va asumir la rehabilitación y va xestionar el contratu d’arriendu cola persona inquilina, abonando mensualmente a la persona propietaria la renta alcordada..
“D’esta manera, el Conceyu contribúi a rehabilitar el parque de vivienda al empar que consigue disponer de viviendes ensin usu para arriendos algamadizos, dando garantíes
tantu a propietarios como a inquilinos”, esplicó’l candidatu. La propuesta d’IX – Más País – IAS tamién inclúi otres midíes pa incentivar la salida al mercáu del alquiler de les 7.100 viviendes vacíes qu’esisten na ciudá, aplicando los recargos nel IBI previstos na nueva Llei pol Derechu a la Vivienda, que pueden llegar hasta’l 150% pa viviendes vacíes propiedá de grandes tenedores.
Amás, la coalición propón l’impulsu un plan integral de renovación urbana nel barriu de L’Arena p’ameyorar l’accesibilidá, la movilidá, les zones estanciales, el moblame urbanu y l’arboláu. L’oxetivu ye facer que’l barriu resulte más habitable, afechu a les persones que viven nél, ganando espaciu pal peatón y creando una redolada más verde y saludable. Un plantegamientu que coincide cola supermanzana prevista nel Plan de Movilidá Sostenible aprobáu’l pasáu mes d’abril.
