Xixón al día

Etiqueta: Asociación Galbán

  • Castrillón acueye un añu más la Carrera Galbán

    Castrillón acueye un añu más la Carrera Galbán

    El Conceyu de Castrillón volverá acoyer anguaño la carrera benéfica qu’entama l’Asociación Galbán de families de neños y neñes con cáncer d’Asturies. La prueba deportiva va celebrase’l domingu 12 de febreru en Piedrasblancas. Va ser la quinta ocasión na que se dispute y yá cunta con un percorríu autorizáu, que va ser distintu al d’años anteriores. La salida y la meta de la carrera van asitiase na plaza d’Europa, colo que pretende evitase
    problemes de aglomeraciones derivaos de la elevada participación nel eventu benéficu.
    L’entamu de la prueba ta previstu pa les 11 de la mañana del domingu 12 de febreru. Les persones que la cuerran van partir de la plaza d’Europa pa siguir por El Castru y Valboniel. Envalórase que los y les participantes na carrera van tardar unos 40 minutos en
    completar el percorríu, según la propuesta que se va llevar nos próximos díes a Xunta de Gobiernu.

    Dende mañana y hasta el día de la carrera, l’Asociación Galbán va movese tolos miércoles hasta’l Mercáu de Piedrasblancas, onde va habilitar un puestu pa facilitar les inscripciones pa la carrera. A fecha de güei, Castrillón ye unu de los conceyos con más participantes inscritos, d’ente los 60 conceyos asturianos que formen parte de la iniciativa solidaria. Hasta’l momentu confirmaron la so presencia 154 persones, colo que pel momentu ye la cuarta carrera que más fiches rexistró, tres les d’Uviéu, Mieres y Xixón. En 2022 inscribiéronse 906 persones en Castrillón y l’organización espera superar el millar anguaño.

  • Galbán y Fontes d’Iviernu, xuníos escontra’l cancer con «Esquía por Galbán»

    Galbán y Fontes d’Iviernu, xuníos escontra’l cancer con «Esquía por Galbán»

    L’Asociación de Families de Neños con Cáncer del Principáu d’Asturies Galbán celebra na Estación Iverniza Fontes d’Iviernu l’eventu solidariu Esquía por Galbán esti sábadu 19 y domingu 20 de febreru.

    En Esquía por Galbán va haber una yincana con calter totalmente lúdicu na pista Brezales la fin de selmana, de 10:30 a 14:30 hores. Nun se va llevar a cabu nengún cronometraxe nin clasificación y ye obligatoriu l’usu de cascu homologáu y gafes tipo mázcara.

    La participación ye gratuita y nun ye necesaria inscripción, pero ta supeditada a l’alquisición d’una camiseta de Galbán, que’l so preciu xube a 5 euros. Los beneficios llograos pola asociación pola vienta de les camisetes y sudaderes van destinase a la investigación nel campu de la oncoloxía infantil y a necesidaes del Hospital Universitariu Central d’Asturies (HUCA) p’ameyorar l’atención sanitaria y la calidá de vida.

    Tamién se va realizar un sortéu en cada xornada, a les 16:30 hores. Nel momentu d’entrega de la camiseta Galbán, va dase adicionalmente una papeleta numberada cola que los participantes na yincana van entrar nun sortéu d’un cheque regalo de 100 euros a utilizar en tender Telesquí mientres la temporada 2021-2022.

    L’eventu ta entamáu pola Asociación Galbán, en collaboración cola Estación y la Escuela de Fontes d’Iviernu. Pueden consultase los detalles del eventu, suxetu a condiciones meteorolóxiques favorables, na web de la Estación (www.fuentesdeinvierno.com).

    Amás, Fontes d’Iviernu acueye esti domingu 20 de febreru los Xuegos Deportivos del Principáu d’Asturies. Los mozos participantes van competir na modalidá de slalom xigante a una manga en cinco categoríes distintes qu’inclúin cadetes, infantiles, esquiles, redrueyos y pre-redrueyos. Va Haber premios a los trés primeros clasificaos por categoría y sexu, que se van apurrir a les 15:00 hores tres la finalización de la prueba.